Стала вядома, хто прафінансаваў палёт Васілеўскай у космас і колькі ён каштаваў
![Марына Васілеўская на МКС](/sites/default/files/styles/gallery_main/public/2024-03/mar1.jpg.webp?itok=XrFzD9cr)
Марына Васілеўская на МКС / roscosmos.ru
Стала вядома, хто прафінансаваў палёт беларускі Марыны Васілеўскай у космас і колькі ён каштаваў. "Гэта, я вам скажу, нятаннае мерапрыемства. Абышоўся б да 70 мільёнаў долараў гэты палёт", — заявіў у аўторак Аляксандр Лукашэнка. Паводле яго слоў, Уладзімір Пуцін "дапамог", і Расія прафінансавала падрыхтоўку і запуск у космас Васілеўскай.
Лукашэнка лічыць, што РБ стала "сапраўды касмічнай дзяржавай".
Марыне Васілеўскай 33 гады. Яна працавала бортправадніцай авіякампаніі "Белавія". Васілеўская стала першым касманаўтам у гісторыі незалежнай Беларусі. 23 сакавіка з другой спробы яна паляцела на Міжнародную касмічную станцыю на "Саюзе МС-25". З 25 сакавіка яна знаходзіцца на МКС, усміхаецца, кажа, што ў яе "неверагодны настрой". Аляксандр Лукашэнка прызнаўся, што яго "нават насцярожвае... такі спакой касманаўта нашага".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.