Сілавікі зноў прымусілі бацьку добраахвотніка Урбановіча запісаць да яго зварот
![Дзяніс Урбановіч ва Украіне, 25 лютага 2024-га](/sites/default/files/styles/gallery_main/public/2024-02/durb.jpg.webp?itok=unLBGW5H)
Дзяніс Урбановіч ва Украіне, 25 лютага 2024-га / t.me/URBANfront23/
Сілавікі ў Беларусі зноў прымусілі бацьку добраахвотніка з палка Каліноўскага Дзяніса Урбановіча запісаць да яго відэазварот. "Нам трэба на радзіме тут парадак наводзіць", — кажа ён і заклікае сына вярнуцца. Пры гэтым адзначае: "Цябе, можа, не расстраляюць тут, ну, 10 гадоў адседзіш".
Падобныя відэа з бацькам Урбановіча сілавікі публікавалі ўжо неаднаразова. Яны з аднаго боку заяўляюць, што несур'ёзна адносяцца да беларускіх добраахвотнікаў ва Украіне. Аднак працягваюць спрабаваць уздзейнічаць на іх праз сваякоў, якія жывуць у РБ.
Дзяніс Урбановіч у Беларусі кіраваў "Маладым фронтам", яго неаднаразова затрымлівалі. Падчас рэпрэсій быў вымушаны выехаць за мяжу, ваюе супраць расійскіх акупантаў ўжо трэці год. Быў у самых гарачых кропках фронту, у тым ліку і ў Бахмуце, камандаваў штурмавой групай. Мае шматлікія раненні, пасля якіх вяртаўся ў сваё падраздзяленне.
Урбановіч — адзін з самых вопытных байцоў у батальёне "Волат" палка Каліноўскага, мае ўзнагароды.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.