Спартсменаў з РБ і РФ не дапусцяць на цырымонію адкрыцця Паралімпіяды ў Парыжы

Спартсменаў з Беларусі і Расіі не дапусцяць на цырымонію адкрыцця Паралімпіяды ў Парыжы 28 жніўня (як і на цырымонію закрыцця 8 верасня). Пра гэта ў сераду паведаміў Міжнародны паралімпійскі камітэт.

Беларускія і расійскія спартсмены дапушчаныя да Паралімпіяды выключна ў нейтральным статусе і ў адзіночных відах спорту. Цяпер апублікаваныя правілы іх удзелу ў спаборніцтвах. Узнагароды, заваяваныя атлетамі з РБ і РФ, не будуць улічвацца ў агульным медальным заліку Паралімпіяды. Калі нейтральны спартсмен выйграе залаты медаль, будзе выкананы паралімпійскі гімн.

Дэманстрацыя дзяржаўнай сімволікі Беларусі і Расіі забараняецца, як і прысутнасць на ўніформе нацыянальных колераў, герба ці назвы краіны. Спартсмены будуць выступаць пад белым сцягам з чорнымі літарамі, якія "азначаюць прыналежнасць да нейтральных спартсменаў".

Падчас Паралімпіяды будзе створаны "незалежны знешні орган", які зоймецца ацэнкай атлетаў і дапаможнага персаналу. Тыя з іх, хто падтрымлівае агрэсію Расію супраць Украіны, ці мае дачыненне да сілавых структур, допуску не атрымаюць.

У Расіі названыя ўмовы ўжо назвалі "дыскрымінацыйнымі".

Пра тое, што беларусаў і расіян з пэўнымі абмежаваннямі дапусцілі да Парлалімпіяды, стала вядома ў верасні 2023-га. Санкцыі на Беларусь і Расію наклалі ў 2022 годзе пасля маштабнага ўварвання РФ ва Украіну.