“Шэйпічы”, “Друкарская” — зацвердзілі назвы новых станцый мінскага метро

Мінгарвыканкам зацвердзіў назвы новых станцый сталічнага метро, якія пабудуюць на 3-й і 4-й лініі. Гаворка ідзе пра аб’екты, якія пакуль яшчэ толькі праектуюцца. З дакумента, апублікаванага на Нацыянальным прававым інтэрнэт-партале, вынікае, што станцыі другога ўчастку трэцяй линіі метро будуць называцца наступным чынам:

• “Прафсаюзная” (перасячэнне праспекта Пераможцаў і вуліцы Мельнікайтэ;
• “Пярэспа” (перасячэнне праспекта Машэрава і вуліцы Крапотніка);
• “Камароўская” (перасячэнне вуліц Максіма Багдановіча і Веры Харужай);
• “Парк Дружбы Народаў” (перасячэнне вуліц Максіма Багдановіча і Сурганава);
• “Івана Мележа” (перасячэнне вуліц Максіма Багдановіча і Халтурына);
• “Зялёны Луг” (перасячэнне вуліц Шырокай і Усходняй);
• “Лагойская” (перасячэнне Лагойскага тракту і вуліцы Гамарніка).

Станцыі чацвёртай лініі метро, будаўніцтва якой яшчэ не пачыналася, будуць называцца так:

• “Чыжоўка” (перасячэнне Ташкенцкай і Галадзеда);
• “Азёрная” (перасячэнне вуліцы Малініна і праспекта Ракасоўскага);
• “Шэйпічы” (перасячэнне вуліцы Пляханава і праспекта Ракасоўскага);
• “Серабранка” (перасячэнне вуліц Алега Кашавога і Ванеева з праспектам Ракасоўскага);
• “Даўгабродская” (перасячэнне вуліц Алега Кашавога і Даўгабродскай з бульварам Трактарабудаўнікоў);
• “Сляпянка” (перасячэнне вуліц Уральскай і Фролікава);
• “Батанічны сад” (перасячэнне вуліц Платонава і Акадэмічнай);
• “Друкарская” (перасячэнне праспекта Незалежнасці і вуліцы Сурганава);
• “Максіма Багдановіча” (перасячэнне вуліц Максіма Багдановіча, Арлоўскай і Сурганава).

Адкрыццё 3-й і 4-й ліній запланаванае на 2017-2035 гады. Трэцюю лінію ўжо будуюць — яе першая чарга працягласцю ў чатыры станцыі можа адкрыцца налета.