У каментары адзначаецца, што асобы ў "чорным спісе" могуць быць адказнымі "за акты гвалту і арышты, здзейсненыя пасля прэзідэнцкіх выбараў у рэспубліцы". Што гэта за асобы? Акрамя Аляксандра Лукашэнкі, гэта яго сын Віктар, кіраўнік Адміністрацыі прэзідэнта Ігар Сергеенка, старшыня КДБ Іван Тэртэль, прэс-сакратарка Лукашэнкі Наталля Эйсмант ды іншыя.
Швейцарыя вырашыла ўключыць у пастанову аб увядзенні санкцый эмбарга на ўзбраенні, якія могуць выкарыстаць для ўнутраных рэпрэсій. Федэральная рада Швейцарыі "рэагуе на рэпрэсіі супраць грамадзянскай супольнасці і прадстаўнікоў апазіцыі ў Беларусі, якія працягваюцца". Выказваецца заклапочанасць напружанай сітуацыяй у нашай краіне. Швейцарыя заклікае да дыялогу паміж уладамі і грамадзянскай супольнасцю.
Выпадкова ці не, але Швейцарыя ўвяла санкцыі пасля вынясення ў Мінску прысуду швейцарскай беларусцы. Наталлю Хершэ за сарваную з амапаўца ў Мінску балаклаву (!) асудзілі на 2,5 года калоніі агульнага рэжыму.
Ці ўсведамлялі ў Мінску магчымую рэакцыю Швейцарыі? Магчыма, што не. Бо праз тры дні пасля прысуду Аляксандр Лукашэнка віншаваў з абраннем на пасаду швейцарскага прэзідэнта Гі Пармелена і разлічваў на "паглыбленне сувязяў".
