На мастацкі музей у Пецярбургу склалі пратакол за лозунг "Жыве Беларусь"

У Санкт-Пецярбургу пратакол за дэманстрацыю нацысцкай сімволікі склалі на музей сучаснага мастацтва "Эрарта". Прычынай стаў лозунг "Жыве Беларусь", паведамляе тэлеграм-канал кіраўніцы аб'яднанай прэс-службы судоў горада Дар'і Лебедзевай.

У матэрыялах справы сцвярджаецца, што 6 траўня музей сучаснага мастацтва "Эрарта" арганізаваў "публічнае дэманстраванне нацысцкай атрыбутыкі". Гаворка ідзе пра карціну "Фестываль", дзе паказваецца танец людзей у народных касцюмах, а побач з імі — тры мужчыны ў строгіх дзелавых касцюмах. Пад выявай зроблены чырвоны надпіс "Жыве Беларусь".

Эксперты вырашылі, што гэты лозунг быў сімвалам 13-га Беларускага паліцэйскага батальёна пры СД і 30-й пяхотнай дывізіі Вафен-СС нароўні з нацысцкім прывітаннем. Матэрыялы справы перададзеныя ў суд.

Аўтарам карціны з'яўляецца мастак Сяргей Грыневіч. Ён намаляваў яе яшчэў 2014 годзе

Дарэчы, у снежні 2019-га Уладзімір Пуцін зняў забарону на выкарыстанне нацысцкай сімволікі і атрыбутыкі ў навуцы, мастацтве і літаратуры, калі пры гэтым няма прапаганды і апраўдання нацызму. Перад тым, як паведамлялася, расійскія суды былі проста перагружаныя такімі справамі.