У Беларусі пацвердзілі, што не выпусцяць за мяжу расійскіх прызыўнікоў

Расійскія прызыўнікі, якія атрымалі забарону на выезд за мяжу, не змогуць выехаць праз Беларусь. Пра гэта журналістцы "Белсата", якая звярнулася як прыватная асоба, паведамілі ў Дзяржаўным памежным камітэце Беларусі.

"Калі яму не выставіць Расійская Федэрацыя забарону выезду і ўсё ў парадку з дакументамі, то выпусцяць", — адказалі беларускія памежнікі.

Днямі паведамлялася, што памежнікі ўпершыню не выпусцілі з Беларусі расіяніна, які спрабаваў вылецець з Мінску спачатку ў Тбілісі, а потым у Ерэван. Расіянін атрымаў позву ў войска і павінен быў 29 красавіка прыйсці на медагляд. У спецыяльным расійскім электронным рэестры з’явілася забарона на выезд яго з РФ.

У Памежным камітэце Беларусі пацвердзілі, што маюць агульную базу даных з Расіяй, і параілі звяртацца "ў кампетэнтныя органы Расійскай Федэрацыі":

"Калі адкажуць, што выезд не абмежаваны, калі ласка, можна выязджаць з тэрыторыі Беларусі. Калі выезд забаронены, то ўсе пытанні да Расійскай Федэрацыі. Калі асоба будзе ў базе, яе не выпусцяць. Калі не будзе ў базе абмежаваных да выезду, мы выпусцім".

Раней расійскія прызыўнікі маглі без праблем выехаць праз Беларусь.