Генеральны сакратар ААН гаварыў з Лукашэнкам пра амністыю палітвязняў
Сустрэча адбылася на просьбу Аляксандра Лукашэнкі / president.gov.by
4 ліпеня ў Астане падчас саміту Шанхайскай арганізацыі супрацоўніцтва адбылася сустрэча генеральнага сакратара Арганізацыі Аб'яднаных Нацый Антоніу Гутэрыша з Аляксандрам Лукашэнкам. Лукашэнкаўская прапаганда не паведаміла асноўную тэму іх размовы (прэс-служба Лукашэнкі паведаміла толькі, што размова вялася за зачыненымі дзвярыма), але пра яе напісала прэс-служба ААН.
"Генеральны сакратар выказаў занепакоенасць сітуацыяй з правамі чалавека ў Беларусі, — адзначае un.org. — Ён выказаў пажаданне, каб учорашняя амністыя стала крокам да поўнай павагі правоў чалавека і асноўных свабод у Беларусі".
У паведамленні адзначаецца, што сустрэча адбылася на просьбу Лукашэнкі, якому хацелася пагаварыць пра "мірныя прапановы" па Украіне. Пытанне палітвязняў і правоў чалавека відавочна ўзняў Гутэрыш, якому стала вядома пра выхад на волю ў РБ невялікай групы палітвязняў.
