Еўрапейскі суд па правах чалавека зноў адмовіў беларусу Гнёту ў абароне
![Андрэй Гнёт](/sites/default/files/styles/gallery_main/public/2024-08/26758102_1688738187836058_7483481539732923331_o.jpg.webp?itok=Yy0nUYZ9)
Андрэй Гнёт / facebook.com/andrew.gnyot/
Еўрапейскі суд па правах чалавека адмовіў беларусу Андрэю Гнёту ў абароне ад экстрадыцыі. Пра гэта рэжысёр паведаміў у Facebook. Палітуцекачу пагражае высылка ў Беларусь з Сербіі. Разгляд апеляцыі рэжысёра Андрэя Гнёта на рашэнне аб экстрадыцыі разгледзяць 27 жніўня ў Бялградзе.
Гнёт падкрэслівае, што Еўрапейскі суд па правах чалавека адмовіў яму ўжо трэці раз. Там лічаць яго запыт "перадчасным". "Цяпер у мяне ўсё яшчэ няма ніякай міжнароднай падтрымкі", — піша беларус.
Андрэй Гнёт — рэжысёр тэлерэкламы і музычных кліпаў, а таксама сузаснавальнік Свабоднага аб'яднання спартоўцаў SOS BY, якое ў РБ аб'явілі "экстрэмісцкім фармаваннем". Гнёт пакінуў Беларусь па палітычных матывах. У кастрычніку 2023-га яго затрымалі ў Сербіі паводле ордара Інтэрпала: рэжым Лукашэнкі абвясціў Гнёта ў міжнародны вышук, абвінаваціўшы ў нявыплаце падаткаў.
Сем месяцаў палітуцякач правёў у сербскай турме, потым яго перавялі пад хатні арышт. Вярхоўны суд Сербіі пастанавіў экстрадзіраваць Андрэя Гнёта ў Беларусь, але ён з адвакатам абскардзіў гэтае рашэнне. У абарону Гнёта выступілі разнастайныя беларускія і міжнародныя арганізацыі, у тым ліку Amnesty International. Ён піша, што цяпер яму патрэбныя яшчэ больш юрыдычных рэсурсаў унутры Сербіі, якія працуюць па перадаплаце. Дапамагчы Андрэю можна па спасылцы.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.