Мінск дамагаўся, каб Ціханоўскую затрымалі ў Арменіі

Улады Беларусі спрабавалі выкарыстаць механізмы міждзяржаўнага вышуку, каб перашкодзіць візіту Святланы Ціханоўскай у Арменію і не даць ёй удзельнічаць у саміце Еўрапейскай палітычнай супольнасці. Пра гэта выданню "Зеркало" расказаў дыпламатычны дарадца лідаркі дэмсілаў Дзяніс Кучынскі.

Саміт праходзіў 4-5 траўня. Паводле Кучынскага, першапачаткова дэлегацыя меркавала вылецець у Арменію з Варшавы ў суботу, 2 траўня, каб ужо ў нядзелю быць на месцы разам з большасцю сусветных лідараў. Аднак у апошні момант планы памяняліся, бо прэзідэнт Польшчы Караль Наўроцкі запрасіў паўдзельнічаць у цырымоніі ўзнагароджання Анджэя Пачобута. Таму вылет дэлегацыі перанеслі на вечар нядзелі.

Кучынскі кажа, што затрымка спрацавала на карысць беларускай дэлегацыі, бо менавіта ў апошні момант "пачаліся рухі з боку рэжыму Лукашэнкі". Афіцыйны Мінск хацеў затрымаць Ціханоўскую і яе дэлегацыю, скарыстаўшыся механізмамі міждзяржаўнага вышуку. Якім быў адказ армянскага боку, Кучынскі паведамляць адмовіўся з прычыны бяспекі.

"Мы атрымалі моцныя запэўніванні на самым высокім дзяржаўным узроўні, што ўсё будзе арганізавана належным чынам. Армяне зрабілі ўсё бездакорна: пратакольны прыём, дзяржаўная ахова і каардынацыя — усё было арганізавана на вельмі высокім прафесійным узроўні. Было відаць, што гэта сапраўдная палітычная пазіцыя краіны", — дадаў ён.

Кучынскі назваў пазіцыю Арменіі вельмі прынцыповай: "Яна прыняла Святлану Ціханоўскую. І гэта быў вельмі моцны сігнал. Гэта чарговы доказ таго, што Лукашэнка ўсё яшчэ дрэнна разумее, з кім мае справу. Ён дагэтуль думае, што Святлану можна запалохаць ці прымусіць адмовіцца ад нейкіх крокаў. Яна выдатна разумее рызыкі, але не дазваляе страху вызначаць свае рашэнні".