"Справядлівы свет" не сабраў 5000 сябраў, але падае дакументы на перарэгістрацыю
![Сяргей Калякін / З архіва Еўрарадыё](/sites/default/files/styles/main_image_watermark_/public/2023-08/dsc_2583_0_0.jpg.webp?itok=y2NK_szm)
Сяргей Калякін / З архіва Еўрарадыё
Беларуская партыя левых "Справядлівы свет" збіраецца падаць дакументы на перарэгістрацыю 2 чэрвеня. Днямі прайшоў партыйны з'езд. Як кажа ў гутарцы з "Народнай воляй" кіраўнік "Справядлівага свету" Сяргей Калякін, персанальныя даныя людзей Мінюсту не паведамяць. Пры гэтым патрэбную колькасць сябраў (5 тысяч чалавек) партыя не мае.
"Мы падаем тую колькасць, якая ў нас ёсць, — кажа Калякін. — Мы не хочам самаліквідавацца, таму накіроўваем дакументы ў Мінюст, і хай яны прымаюць рашэнне".
Напярэдадні стала вядома, што дакументы на перарэгістрацыю падала ў Міністэрства юстыцыі Беларуская партыя "Зялёныя". Яна таксама не далучыла спіс партыйцаў.
Прадстаўнікі рэжыму неаднаразова заяўлялі, што пасля перарэгістрацыі ў Беларусі застануцца 3-4 "лаяльныя" яму палітычныя партыі. Першую рэгістрацыю паводле новых правілаў атрымала новаствораная праўладная партыя "Белая Русь".
На сённяшні дзень кіраўнік АГП Мікалай Казлоў і кіраўнік Партыі БНФ Рыгор Кастусёў знаходзяцца ў зняволенні. Праваабаронцы прызналі іх палітвязнямі.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.