Кіраўнік МЗС Украіны расказаў, якімі будуць санкцыі супраць кіраўнікоў Беларусі

Кіраўнік МЗС Украіны расказаў, якімі будуць санкцыі супраць кіраўнікоў Беларусі

Украіна гатовая далучыцца да еўрапейскіх санкцыяў супраць беларускага кіраўніцтва, але насцярожана ставіцца да эканамічных санкцыяў. Пра гэта міністр замежных спраў Украіны Дзмітрый Кулеба расказаў у інтэрв'ю Бі-Бі-Сі.

2 кастрычніка Еўрасаюз увёў санкцыі супраць 40 прадстаўнікоў Беларусі — 28 сілавікоў і 12 чалавек, звязаных з Цэнтрвыбаркамам. Ім забаронены ўезд у краіны ЕС, а іх актывы павінны быць замарожаныя. 

Кіраўнік украінскай дыпламатыі лічыць, што Украіна мусіць быць салідарнай з Еўрасаюзам у стаўленні да Беларусі, бо падтрымлівае прынцыпы ЕС. 

Па яго словах, гаворка ідзе пра паслядоўнасць у палітыцы і салідарнасць: "Украіна лічыць, што ў гэтай сітуацыі важна дзейнічаць адзіным фронтам. Калі мы ўжо з'яўляемся краінай Захаду, калі мы падтрымліваем пазіцыю ЕС, то нам трэба дзейнічаць сумесна з Еўрапейскім Саюзам у гэтых пытаннях. Тут вельмі важнае пытанне салідарнасці".

Кулеба не бачыць падставаў разрываць дыпламатычныя адносіны або паніжаць дыпламатычнае прадстаўніцтва да ўзроўню часовага паверанага. "Але я бачу падставы, і вы ведаеце, што гэта афіцыйная пазіцыя Украіны, згарнуць афіцыйныя кантакты, пакінуўшы акно камунікацыі ў МЗС", — дадае міністр.

Пры гэтым ён лічыць, што санкцыі супраць прадстаўнікоў Беларусі не павінныя быць эканамічнымі, каб не падштурхнуць беларускую эканоміку ў рукі Расіі. "Трэба будзе глядзець, што будзе з беларускай эканомікай у бліжэйшыя месяцы з пункту гледжання расійскіх грошай і расійскага кантролю ў гэтым бізнэсе. Вось тады трэба сядаць і аналізаваць кожны буйны кантракт, і глядзець, ці не з'явіліся дадатковыя рызыкі, таму што ў нас ёсць высокае ўзаемадзеянне і ў ваенна-гандлёвым сектары. Але пакуль не лічу, што ўвядзенне гандлёвага эмбарга з боку Беларусі ці Украіны, было б мудрым крокам", — тлумачыць кіраўнік украінскай дыпламатыі.

Ён кажа, што крыўдна назіраць умацаванне пазіцыяў Расіі ў Беларусі, бо гэта нясе пагрозу для нацыянальнай бяспекі Украіны.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі