Былога беларускага вайскоўца Паўла Кучынскага асудзілі на 19 гадоў зняволення
Павел Кучынскі / spring96.org
Былога беларускага вайскоўца Паўла Кучынскага асудзілі на 19 гадоў калоніі ўзмоцненага рэжыму. Яго прызналі вінаватым паводле сямі крымінальных артыкулаў. Сярод іх — "здрада дзяржаве", "акт тэрарызму" і "стварэнне арганізацыі для ажыццяўлення тэрарыстычнай дзейнасці або ўдзел у ёй", паведамляюць праваабаронцы.
Справу з кастрычніка 2023-га разглядаў Мінскі абласны суд (суддзя — Аляксандр Рыбакоў). Прысуд быў агучаны яшчэ 15 снежня, але пра яго стала вядома толькі цяпер.
Кучынскага затрымалі ў 2022 годзе. Летась арганізацыя сілавікоў Беларусі BYPOL пісала, што Паўла Кучынскага пад катаваннямі прымусілі ўдзельнічаць у правакацыі супраць іх.
Кучынскаму 31 год, ён — жыхар Мінска. У пачатку верасня 2022-га ў "Белгазпрамбанку" былі затрыманы як мінімум дзесяць інкасатараў. Сярод іх быў і Павел Кучынскі.
