Санкцыі будуць, пакуль Лукашэнка не зменіць падыход — кіраўніца МЗС Канады
![Лукашенко вытирает лоб](/sites/default/files/styles/gallery_main/public/2024-02/lukashenko_vytiraet_lob.jpg.webp?itok=5SdLpoFk)
Аляксандр Лукашэнка / Getty Images
Канада яшчэ ў 2021 годзе ўвяла сектаральныя санкцыі супраць імпарту беларускіх калійных угнаенняў. Але пасля пачатку расійскага ўварвання ва Украіну шэраг краін, а таксама кіраўніцтва ААН пачалі лабіяваць выключэнне калію з санкцыйных спісаў. Маўляў, дзеля харчовай бяспекі. Ці плануе Канада зняць гэтыя санкцыі?
Еўрарадыё спытала міністарку замежных спраў Канады Мелані Жалі.
“Мы захавалі гэтыя санкцыі, бо, па-першае, мы верым у іх. А па-другое, мы лічым, што яны працуюць. Разам з тым, з нашага боку мы працягнулі падтрымку многіх краін праз Сусветную харчовую праграму, бо менавіта гэта і было праблемай — адсутнасць харчовай бяспекі. Мы таксама паклапаціліся пра тое, каб павялічыць экспарт калійных угнаенняў”.
Спадарыня Жалі дадала: Канада паклапацілася, каб вырашыць праблемы харчовай бяспекі многіх краін Афрыкі і Блізкага Усходу.
“І мы працягнем аказваць ціск на рэжым Лукашэнкі з дапамогай эканамічных санкцый, і ўгнаенні — асноўная сфера, у якой мы працягнем уздзейнічаць”, — адзначыла міністарка.
Таксама Канада не прымае аргументаў пра тое, што перамовы могуць быць лепшымі за санкцыі ў кантэксце лукашэнкаўскага саўдзелу ў пуцінскай вайне.
“Пакуль гэта не зменіцца і пакуль Беларусь не зменіць свой курс, мы працягнем аказваць такую форму ціску. На дадзены момант, мы ўжо ўвялі абмежаванні супраць больш чым сотні людзей і арганізацый. І думаем, што гэта працуе.
Мы думаем, што можам увесці больш санкцый у дачыненні да большай колькасці людзей і арганізацый. Мы будзем працаваць, вядома, разам з ЕС, ЗША і іншымі краінамі G7 для ўвядзення гэтых абмежаванняў”.
Кіраўніца МЗС Канады дадала: “Пакуль Лукашэнка не зменіць свой падыход да падтрымкі Пуціна і яго незаконнай вайны, мы будзем прытрымлівацца нашага падыходу”.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.