Нобелеўскаму лаўрэату Алесю Бяляцкаму анулявалі беларускі пашпарт

У Беларусі анулявалі пашпарт заснавальніка праваабарончага цэнтра "Вясна" і лаўрэата Нобелеўскай прэміі міру Алеся Бяляцкага. Дакумент прызнаны нядзейсным, хаця ён дзейнічаў да 2028 года, паведамляюць у ПЦ "Вясна".

Сам Бяляцкі называе гэтае рашэнне адвольным і незаконным: "Гэта чарговая форма транснацыянальных рэпрэсій, скіраваная на тое, каб ускладніць жыццё дэпартаваным палітвязням па-за межамі краіны. Улады рытуальна адразаюць нашыя сувязі з Беларуссю. Марная справа, бо Беларусь заўсёды будзе ў нашых дзеях і сэрцах".

Таксама сёння паведаміў пра ануляванне свайго пашпарта экс-палітвязень журналіст Ігар Карней.

Пра ануляванне пашпартоў экс-палітвязняў стала вядома днямі. Афіцыйны Мінск прызнае несапраўднымі дакументы людзей, якіх ён выслаў за межы краіны. Хутчэй за ўсё мера пачала дзейнічаць пасля Новага года.