Вы тут

На просьбу растлумачыць затрыманне Сяргея Сацука ў ДФР адказалі: "Хабар"

Галоўны рэдактар выдання "Ежедневник" Сяргей Сацук

Аляксандр Сацук, брат затрыманага 25 сакавіка галоўрэда дзелавога выдання "Ежедневник" Сяргея Сацука, пабываў у Дэпартаменце фінансавых расследаванняў Камітэта дзяржкантролю Беларусі і забраў рэчы і дакументы Сяргея. Па словах Аляксандра Сацука, супрацоўнікі ДФР не хацелі тлумачыць прычыны затрымання журналіста.

Жонка патэлефанавала. Ёй кажуць: "Брат прыедзе — яму ўсё раскажуць". Я прыязджаю — мне нічога не расказваюць. Кажуць: "Ён выйдзе і ўсё раскажа", — распавядае пра сваё кароткае знаходжанне ў КДК Аляксандр Сацук.

Пасля таго, як супрацоўнік ДФР перадаў Аляксандру Сацуку ключ ад машыны Сяргея і дакументы на яе, Аляксандр перапытаў пра прычыны затрымання.

Сказаў ён толькі слова "хабар". І ўсё, — працягвае Аляксандр. — Я магу выказаць здагадку, што гэта звязана з беларускім тэлебачаннем, там было агучана, што Сяргей нібыта ўзяў пяць тысяч.

Увечары 22 жніўня 2019 года ў праграме "Панарама" на канале "Беларусь 1" быў апублікаваны сюжэт "Замоўленыя артыкулы "незалежных" беларускіх СМІ". На запісе, зробленым схаванай камерай у офісным памяшканні, відаць, як Сацук забірае са стала канверт. Аўтары сюжэту сцвярджаюць, што ў канверце былі грошы, за якія журналіст паабяцаў напісаць артыкул пра медыцынскі бізнес.

Сюжет телеканала "Беларусь 1"

У сюжэце таксама паказаны нехта Віктар Мядзведскі, якога называюць "удзельнікам крымінальнага працэсу за ўхіленне ад выплаты падаткаў" і "фактычным уласнікам і кіраўніком замежнай кампаніі". Паводле яго слоў, ён перадаў Сяргею Сацуку інфармацыю аб продажах медыкаментаў па завышаных цэнах. Журналіста гэта нібыта зацікавіла. За публікацыю гэтых звестак Мядзведскі нібыта перадаў журналісту 3000 долараў.

Потым Мядзведскі кажа, што замаўляў Сацуку яшчэ адзін артыкул, які выйшла ў студзені 2019 года, і ў агульнай складанасці заплаціў 5000 долараў.

Сяргей Сацук набыў шырокую вядомасць сваімі журналісцкімі расследаваннямі. Самым гучным з іх за апошні час стала расследаванне аб пастаўках у Беларусь незарэгістраванай вакцыны "Эўпента". На днях Сацук апублікаваў крытычную калонку пра барацьбу беларускіх улад з каранавіруснай інфекцыяй.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.