Вы тут

На дзяўчыну загінулага Шышова ў Беларусі пачалі крымінальную справу

Бажэна Жолудзь / кадр з відэа

Упраўленне Следчага камітэта па Мінску пачало крымінальную справу на 21-гадовую ўраджэнку Гомельшчыны Бажэну Жолудзь. Ад жніўня 2020 года дзяўчына пастаянна пражывае на тэрыторыі Украіны.

Бажэна — грамадзянская жонка актывіста Віталя Шышова, які на пачатку жніўня загінуў у Кіеве пры дзіўных акалічнасцях. Дзяўчына заявіла, што не верыць у самагубства Віталя.

Нагодай для крымінальнай справы сталі акцыі каля беларускай амбасады ў Кіеве, у якіх удзельнічала Бажэна Жолудзь. Пасля смерці Шышова беларусы ва Украіне прыйшлі да беларускай амбасады. Некаторыя падазраюць, што беларускія спецслужбы спрычыніліся да гібелі Шышова, бо ён удзельнічаў у акцыях пратэсту і з'ехаў ва Украіну ад палітычнага пераследу.

Як заяўляюць следчыя, Бажэна Жолудзь "заклікала да масавых беспарадкаў, што суправаджаюцца гвалтам над асобай і узброеным супрацівам прадстаўнікам улады, то бок да здзяйснення дзеянняў, накіраваных на прычыненне шкоды нацыянальнай бяспецы Рэспублікі Беларусь". Падставай сталі заклікі дзяўчыны браць у рукі вілы і пераходзіць да нямірнага пратэсту.

На яе пачалі крымінальную справу паводле ч. 3 арт. 361 Крымінальнага кодэкса (заклікі да дзеянняў, накіраваных на прычыненне шкоды нацыянальнай бяспецы Рэспублікі Беларусь). Ёй пагражае да пяці гадоў пазбаўлення волі.

У каментары Еўрарадыё Бажэна Жолудзь сказала, што не здіўленая такім рашэннем беларускіх уладаў. Ад больш падрабязнага каментара яна адмовілася, бо дваедалася пра крымінальную справу за хвіліну да нашага тэлефанавання.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.