"Локі", "Фарга", "Карона" і не толькі: найлепшыя серыялы гэтай восені
![Лучшие сериалы осени 2023](/sites/default/files/styles/gallery_main/public/2023-09/yukshfdn.jpg.webp?itok=bLLXLfhr)
Спіс самых цікавых серыялаў, якія выйдуць гэтай восенню / Еўрарадыё
Восень — заўсёды гарачая пара для прэм'ер: выходзяць новыя фільмы, серыялы, гульні. Але як не згубіцца ў плыні навінак? Еўрарадыё прапануе пачаць са спісу самых цікавых серыялаў, якія выйдуць у найбліжэйшыя тры месяцы.
"Ранішняе шоў" (The morning show) — 3 сезон, 13 верасня
Працяг хіта ад Apple TV пра вядоўцаў ранішняга шоў на адным з амерыканскіх тэлеканалаў. Галоўную ролю тут граюць Джэніфер Эністан і Рыз Уізэрспун, а стваральнікі змаглі зрабіць з "Ранішняга шоў" не звычайную мыльную драму пра сумных журналістак, а драму з выдатным сюжэтам і мноствам нечаканых паваротаў.
"Палавое выхаванне" (Sex education) — 4 сезон, 21 верасня
Заключны сезон аднаго з галоўных хітоў Netflix, дзе часам трагікамічна, часам у фармаце сатыры распавядаюць пра групу падлеткаў і іх знаёмства з пачуццёвасцю, сэксуальнасцю і стасункамі. На гэты раз героі не вучацца ў адной школе, і іх гісторыя падыходзіць да канца.
"Локі" (Loki) — 2 сезон, 6 кастрычніка
Серыял пра бога Локі стаў поспехам для Marvel і Disney, таму што тут яны змаглі прапанаваць гледачам сюжэт, адрозны ад звыклых супергеройскіх фільмаў з тым жа персанажам. Другі сезон фанаты чакалі два гады — прычым, у іх лік трапілі і тыя, хто звычайна не любіць прадукцыю "Марвэл". Добрая нагода даць шанец гэтаму праекту — і праверыць, ці не будзе другі сезон горшым за першы.
"Усё нябачнае нам святло" (All the Light We can not See) — 2 лістапада
Праект ад Netflix, экранізацыя аднайменнай п'есы, уганараванай у свой час Пулітцэраўскай прэміяй. Дзеянне разгортваецца падчас Другой сусветнай вайны, а адаптаваў першакрыніцу для серыяла адзін з аўтараў знакамітых "Вострых брылёў". У галоўных ролях Луі Хофман, Марк Руфала і Х'ю Лоры.
"Непераможны" (Invincible) — 2 сезон, 3 лістапада
Яшчэ адна гісторыя пра супергерояў, але сапраўды адрозная ад таго, што нам звычайна прапануюць Marvel і DC. У гэтым анімацыйным серыяле галоўны герой-падлетак, сын самага магутнага супергероя на планеце. Але выяўляецца, што з бацькам усё не так проста — і, акрамя барацьбы са злом, у хлопца з'яўляецца шмат маральных дылем. За сюжэт і рэалізацыю серыял атрымаў шмат добрых водгукаў ад крытыкаў.
"Фарга" (Fargo) — 5 сезон, 21 лістапада
Натхнёны аднайменным фільмам братоў Коэн, серыял "Фарга" — гэта серыял-анталогія ў жанры чорнай трагікамедыі. Дзеянне новага сезону будзе адбывацца ў "глыбіннай Амерыцы" ў 2019 годзе, а гісторыю пабудуюць вакол выкрадання людзей і нешчаслівага шлюбу. Як гэта рэалізуюць стваральнікі — даведаемся ў лістападзе.
![Трейлер 5 сезона "Фарго" пока не опубликован](/sites/default/files/styles/default_image_paragraph/public/paragraphs/image/fargo-5-sezon-data-vyhoda.jpg.webp?itok=8SfbpZw-)
"Карона" (Crown) — 6 сезон, дата ўдакладняецца
Новы сезон вялікай драмы Netflix пра брытанскую каралеву Лізавету II павінен выйсці ўжо гэтай восенню. Кажуць, гэта будзе апошні сезон "Кароны" — і дзеянне будзе разгортвацца ад смерці прынцэсы Дыяны да смерці самой каралевы ў 2022 годзе. Праўда, улічваючы грандыёзнасць праекту і вытворчыя складанасці, яго могуць і перанесці з восені на зіму.
![Кейт Миддлтон и Принц Уильям в 6 сезоне "Короны"](/sites/default/files/styles/default_image_paragraph/public/paragraphs/image/crowns6-1-644a824ff39dd.jpeg.webp?itok=V7EIw3hr)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.