Кіраўнік дыпламатыі ЕС выказаўся пра гібель у Кіеве беларуса Віталя Шышова
Кіраўнік дыпламатыі ЕС Жазэп Барэль выказаўся пра гібель у Кіеве беларуса Віталя Шышова. "Правасуддзе павінна адбыцца", — напісаў ён у Twitter. Барэль прызнаўся, што шакаваны паведамленнямі з Украіны пра гібель Шышова, які "дапамог многім пазбегнуць рэпрэсій рэжыму Лукашэнкі". Кіраўнік еўрапейскай дыпламатыі вітае пачатак расследавання, якое праводзіць украінская паліцыя.
Кіраўнік "Беларускага дома ва Украіне" Віталь Шышоў раптоўна знік у Кіеве. Пасля яго знайшлі павешаным у парку. Сябры Шышова ўскладаюць адказнасць на ўлады Беларусі. Паліцыя не выключае "наўмыснае забойства, імітаванае пад суіцыд", ёсць і іншыя версіі. Прэзідэнт Украіны Уладзімір Зяленскі ўзяў пад асабісты кантроль справу аб гібелі беларуса.
