Беларускае МЗС пракаментавала праблемы з беларускімі карткамі ў Еўропе

Карткі Visa трох беларускіх банкаў перасталі працаваць у ЕС праз санкцыі. У беларускім МЗС гэта лічаць "парушэннем элементарных правоў".

Часовы павераны ў справах Беларусі пры ЕС Сяргей Панасюк назваў гэта "тыповым прыкладам феномена празмернага прымянення санкцый". Паводле яго слоў, такія меры б’юць па простых грамадзянах і парушаюць іх элементарныя правы.

"І не толькі на выкарыстанне банкаўскіх картак, але і на такія базавыя рэчы, як права на працу, свабоду перамяшчэння, забеспячэнне харчаваннем і лекамі, аказанне медыцынскай дапамогі", — сказаў Панасюк.

Рашэнне плацежнай сістэмы Visa закранула "Белаграпрамбанк", "Альфа-Банк" (Беларусь) і "Белгазпрамбанк". Цяпер карткі гэтых банкаў не працуюць у краінах Еўрапейскага саюза.

Беларускія банкі патрапілі ў 19-ы пакет санкцый Еўрасаюза супраць Расіі, які ўступіў у сілу 2 снежня 2025 года. У ЕС тлумачылі, што санкцыі накіраваны на абмежаванне магчымасцей Расіі фінансаваць вайну супраць Украіны. Што датычыцца беларускіх банкаў, санкцыі ўводзіліся праз іх сувязь з расійскімі плацежнымі сістэмамі.