Глеб і Крывец ― за Расію, а ў Радзівонава “да нашых суседзяў цікавасці няма”

14 чэрвеня ў Расіі пачынаецца чэмпіянат свету па футболе. Еўрарадыё даведалася ў вядомых беларускіх футбалістаў і трэнераў, каго яны лічаць фаварытамі турніру і за якую зборную будуць балець.

Былы галоўны трэнер зборнай Беларусі па футболе Аляксандр Хацкевіч кажа, што найперш будзе балець за “прыгожы футбол”. Тым не менш, называе фаварытаў, матчы якіх не прапусціць:

“Тут [на сёлетнім чэмпіянаце. ― Еўрарадыё] фаварыты Германія, Бразілія, Францыя, Аргенціна. Але буду перажываць і за расійскую зборную. Праўда, прадказаць, як далёка яны пройдуць, не магу. На дадзеным этапе задачы ― хаця б выйсці з групы. А там, крок за крокам…”

Зорка БАТЭ Віталь Радзівонаў прызнаецца, што яму больш сімпатычныя немцы і бразільцы. Кажа, на яго думку, менавіта гэтыя зборныя і з’яўляюцца сёлетнімі фаварытамі. Ну, можа, яшчэ і зборную Іспаніі можна ў спіс фаварытаў дадаць. А вось зборная Расіі Віталя Радзівонава не цікавіць ўвогуле:

“Не ведаю, чаму, але ў мяне да вынікаў нашых суседзяў няма ніякай цікавасці”.

З калегам катэгарычна не згодны Аляксандр Глеб. Ён найперш будзе балець за расіян. Праўда, шчыра прызнаецца: працягвацца гэта будзе вельмі нядоўга.

“Гэта каманда, якая проста мне бліжэйшая. Але, вядома, гэта не фаварыт. Шчыра кажучы, ім будзе складана нават з групы выйсці, бо не такія простыя сапернікі расіянам дасталіся. Ну, а ў такім выпадку [калі зборная Расіі выляціць з чэмпіянату. ― Еўрарадыё], буду балець за прыгожы футбол. Па праўдзе, мне б хацелася, каб Месі выйграў гэты чэмпіянат свету ― сімпатыю да яго маю. А каб за нейкую каманду балець, у мяне такога няма”, ― кажа Аляксандр Глеб.

Былы трэнер “Крумкачоў” і БАТЭ Алег Дулуб балець не будзе ні за каго. Тым не менш, ёсць каманды, якія выклікаюць сімпатыі ў беларускага спецыяліста:

“Традыцыйна, гэта Бразілія, Іспанія, напэўна, Аргенціна і Германія. І вельмі цікава будзе цяпер на Расію паглядзець. Бо ― краіна-арганізатар. І, на мой погляд, апошнім часам ідзе незаслужана моцны ціск на гульцоў, на трэнераў з боку СМІ. Мне незразумелая прычына гэтага… Ну, і цікава паглядзяць, наколькі гульцы і трэнеры справяцца з гэтым. Толькі ў гэтым мая цікавасць да расійскай зборнай”.

Кажа, калі ў расіян атрымаецца аб’яднаць каманду насуперак усяму негатыву, што на іх выліваюць, то пройдзе зборная далёка. У адваротным выпадку нават з групы не выйдуць.

Футбаліст Сяргей Крывец называе тры каманды, за гульнёй якіх будзе сачыць найперш ― Расія, Польшча і Партугалія.

“За Расію, таму што Расія блізкая мне ― заўжды хваляваўся за расіян. Польшча, бо ўжо шмат гадоў звязанае маё жыццё з Польшчай, жонка мая адтуль. Што да шансаў расіян, то, спадзяюся, што яны хаця б з групы выйдуць. Гэта ўжо будзе нядрэнны вынік для зборнай Расіі”.

Няма чаго за той расійскай зборнай сачыць, упэўнена адказвае трэнер маладзёжнай зборнай Беларусі Людас Румбуціс:

“Я там нічога новага не ўбачу ― гэта на 100%. Там толькі што з ЦСКА ёсць пару цікавых гульцоў, а астатнія… Прынамсі, балець за іх я не буду, але глядзець давядзецца ― я еду на гульню Расія-Егіпет у Піцер 19 чэрвеня. Так, глядзець буду і, магчыма, суперажываць, бо суседзі, але балець за іх дакладна не буду”.

Сярод фаварытаў, за якіх будзе балець, Людас Румбуціс называе зборныя Бразіліі і Германіі. Але не выключае і з’яўленне цёмнага коніка.

Людас Румбуціс: “Я думаю, што цёмны конік ― гэта англічане. У якіх вельмі хуткая каманда, ёсць нападаючыя сусветнага ўзроўню, якія забіваюць. Цяпер у іх саспелая каманда. Не тое, што на чэмпіянаце Еўропы, калі яны не вельмі добра глядзеліся. Думаю, яны будуць вельмі моцнымі”.

Цырымонія адкрыцця чэмпіянату адбудзецца ў Маскве ў 17:30 па беларускім часе. Першы матч чэмпіянату пачнецца ў 18:00. На ім сустрэнуцца гаспадары, зборная Расіі, і зборная Саудаўскай Аравіі.