Вы тут

Герой года, які ўратаваў дзіця: Больш увагі ад дзяўчат пасля гэтага не стала

Віталь Цітоў і уратаваны хлопчык Антон, фота: Сяргей Шэляг, minsknews.by

Віталь Цітоў 28 кастрычніка дастаў дзіця з халоднай вады сталічнай Свіслачы. Ён ішоў з сяброўкай з крамы, калі пачуў крыкі дзяўчыны аб дапамозе. Ішоў дробны дождж, было холадна. Ён распрануўся і прыгнуў у ваду, уратаваў 9-ці гадовага Антона Драздова. Хлопчык выжыў, некаторы час праляжаў у лякарні, з ім усё ў парадку.

А Віталь Цітоў перамог у галасаванні “герой года” па версіі чытачоў БелаПАН і на падобным галасаванні партала Tut.by. Ён вучыцца ў прафесійным ліцэі на зваршчыка.

Праз паўгода пасля ўчынку размаўляем з героем. Віталь адказвае на ўсе пытанні сціпла.

Еўрарадыё: Заўважылі, каб да вас людзі па іншаму сталі ставіцца, можа, пазнаюць?

Віталь Цітоў: Усё гэтак жа, не пазнаюць на вуліцах.

Еўрарадыё: Чым вольны час займаеце?

Віталь Цітоў: Гляджу кіно, гуляў, на камп’ютары гуляю. У Contre-Strike, у танкі зрэдку гуляю. Пару дзён, а пасля на пару месяцаў забываю. Але гэта няшмат часу, можа, гадзіну, бо позна прыходжу з вучобы і стамляюся.

Еўрарадыё: А любімыя месцы ў Мінску ёсць?

Віталь Цітоў: Паркі па дарозе на Дразды, таксама парк каля Камсамольскага возера люблю. А вось у тым месцы, дзе адбылося здарэнне, я бываю рэдка, на ровары праязджаю, здараецца. Тады мы з сяброўкай ішлі з дома ў гандлёвы цэнтр “Галерэя”.

Еўрарадыё: Можа, пасля гэтага выпадку з уратаваным хлопчыкам сталі дзяўчаты тэлефон абрываць?

Віталь Цітоў: Ды не. Дзяўчыны ў мяне няма. Паўгода прайшло пасля таго выпадку, яшчэ ніводная праз гэта не цікавілася.

Еўрарадыё: А сяброў шмат?

Віталь Цітоў: Ды не асабліва, пару сяброў засталося сярод былых аднакласнікаў, з ліцэя таксама пару сяброў.

Еўрарадыё: А не думалі паступаць ва ўніверсітэт пасля ліцэя?

Віталь Цітоў: Я доўга раздумваў над гэтым, але вырашыў — не. Пайду пасля працаваць.

У ТОП-5 асобаў, паводле галасавання на БелаПАН увайшлі:

Віталь Цітоў.

Зміцер Дашкевіч, адзін з лідараў апазіцыі.

Уладзімір Макей, міністр замежных спраў.

Віктар Пракапеня, IT-прадпрымальнік.

Аляксандр Лукашэнка.

У галасаванні на партале tyt.by, апроч Віталя Цітова, былі:

Уладзімір Макей, міністр замежных спраў.

Аляксандра Чычыкава, якая перамагла ў конкурсе прыгажосці на інвалідным вазку.

Яўген Бацян, ратавальнік, які выхапіў жанчыну з вакна кватэры, якая гарэла.

Святлана Коржыч, маці загінулага на службе жаўнера, якая данесла праблемы беларускага войска да грамадскасці. Ды іншыя.