Лукашэнка: Еўропе трэба вучыцца ў Беларусі якасці прадукцыі (відэа)
14 красавіка Аляксандр Лукашэнка ўдзельнічаў у адкрыцці пабудаванага да чэмпіянату свету па хакеі гатэля "Рэнесанс Мінск".
Лукашэнка даў высокую ацэнку якасці беларускіх тавараў. Паводле яго слоў, беларуская прадукцыя "можа быць, не заўсёды вельмі прыгожа запакаваная, як на Захадзе, але па якасці гэта тое, чаго Еўропе трэба вучыцца". Што тычыцца мэблі, то нядрэнна было б укамплектаваць новыя гатэлі беларускай прадукцыяй, адзначыў Аляксандр Лукашэнка.
У час размовы з інвестарамі і кіраўніцтвам гатэля аб падрыхтоўцы гатэльнага персаналу Лукашэнка сказаў, што беларусам варта пераймаць досвед замежных калег.
Як інфармуе БелаПАН, падчас чэмпіянату свету там размесцяцца дэлегацыі шасці краін-удзельніц: хакейныя каманды Канады, Нарвегіі, Славакіі, Даніі, Чэхіі і Швецыі.
