Вы тут

Выбары 2019: парламент мары vs рэальны прагноз Еўрарадыё — Мінская вобласць

Андрэй Дзмітрыеў атрымаў "лайк" ад Дрэйка. Хто яшчэ? Глядзіце ніжэй. 

Сёлетняя парламенцкая кампанія такі крыху здзівіла аматараў прагнозаў. Апазіцыйныя дэпутаткі Алена Анісім і Ганна Канапацкая, якім прадказвалі працяг дэпутацкіх мандатаў, нават не былі зарэгістраваныя ў якасці кандыдатак! І ўсё ж Еўрарадыё рызыкне зрабіць свой прагноз. Але крыху іншым чынам. 

Мы ўважліва вывучылі спіс кандыдатаў, улічылі самаадводы і “чырвоныя карткі” ад выбарчых камісій і найперш вызначыліся з тымі, за каго б самі прагаласавалі ў кожнай з акруг. Пераважная большасць фаварытаў — маладыя, адукаваныя, дзёрзкія — з якімі Палата прадстаўнікоў ажыла б. Але ёсць і старая гвардыя — кандыдаты з вялікім кандыдацкім досведам.

Увага! Выбар рэдыкцыі можа не супадаць з канчатковым рашэннем Цэнтрвыбаркама! Таму мы вызначылі і 110 кандыдатаў, якія, на нашую думку, маюць найбольшыя шанцы быць абранымі ў дэпутаты (у тэксце яны пазначаныя як кандыдаты-спойлеры). Шукайце сваю акругу — а далей вашая справа: пагаджацца з нашым выбарам ці не!

Мінская вобласць:

Бярэзінская акруга № 61

Уладзімір Моніч 

vybory2019.by

У Бярэзінскай акрузе выбіраць амаль няма з каго — тут толькі тры кандыдаты. Па сутнасці, яны ўсе праўладныя, аднак Еўрарадыё выбірае меншую з трох бед — дырэктара фірмы “Сіці касметык” 1976 года нараджэння з Ліберальна-дэмакратычнай партыі Беларусі. 

Кандыдат-спойлер: Ігар Лаўрыненка 

vybory2019.by

Перамогу ж атрымае, магчыма, прадстаўнік Міністэрства абароны 1961 года нараджэння. 

Трэці кандыдат у акрузе — прафсаюзны дзеяч з Камуністычнай партыі.

 

Барысаўская гарадская акруга № 62

Павел Рудакоўскі 

vybory2019.by

Маладосць — гэта тое, на што робіць стаўку Еўрарадыё. Наш кадыдат — беспартыйны тэхнік-тэхнолаг на вытворчасці ТАА “СісЭйТі” 1996 года нараджэння.

Кандыдат-спойлер: Аляксандр Шыпула 

vybory2019.by

Галоўны ўрач Барысаўскага радзільнага дома 1972 года нараджэння. Функцыянер ад сферы аховы здароўя. Не самы благі варыянт.

Іншыя сапернікі: беспартыйныя інжынер і прыёмшчык цягнікоў ды сябра ЛДПБ, які часова не працуе.

 

Барысаўская сельская выбарчая акруга № 63

Ігар Закрэўскі 

vybory2019.by

Тут толькі два кандыдаты. Выбіраем менеджара фірмы “Трэвіс-аўто” 1991 года нараджэння, які прадстаўляе ЛДПБ.

Кандыдат-спойлер: Лілія Ананіч 

vybory2019.by

Але ні ў кога няма шанцаў, калі па тваёй акрузе балатуецца былы міністр інфармацыі, а цяпер усяго толькі намеснік старшыні Беларускага саюза жанчын Лілія Ананіч.

 

Жодзінская выбарчая акруга № 64

Ева Сапрыгіна

Адзіны прадстаўнік апазіцыі з удзельнікаў выбараў у Жодзіне — 30-гадовая цырульнік  з Аб’яднанай грамадзянскай партыі. Эпатажную Еву Сапрыгіну і пазначаем нашай фаварыткай. Прынамсі, было б весела ў Палаце прадстаўнікоў. 

Кандыдат-спойлер: Валерый Стральчонак 

Нам падаецца, што ў парламент ад Жодзіна трапіць намеснік дырэктара па вучэбна-вытворчай рабоце Жодзінскага дзяржаўнага політэхнічнага каледжа, сябра Камуністычнай партыі Беларусі. Ручны камуніст будзе галасаваць як трэба і не высоўвацца.

Іншыя кандыдаты тут: юрыст з ЛДПБ, рабочы БелАЗа, інжынер ТЭЦ і рыэлтарка з апазіцыйных камуністаў.

 

Пухавіцкая выбарчая акруга № 65

Дзмітрый Пілюк

vybory2019.by

Апазіцыйных кандыдатаў у Мінскай вобласці пакуль што мала. Але ў Пухавічах ёсць яўны фаварыт улады, які трапіць у парламент на 100%. Таму Еўрарадыё метадам тыку выбрала дырэктара фірмы “Хольцмайстар” з ЛДПБ 1983 года нараджэння.

Кандыдат-спойлер: Алег Белаконеў

vybory2019.by

Будучы дэпутат — начальнік Генеральнага штаба Узброеных Сіл, першы намеснік міністра абароны 1965 года нараджэння.

Астатніх кандыдатаў можна не пералічваць.

 

Капыльская выбарчая акруга № 66

Аляксей Музыкін

vybory2019.by

Камуніста — старшыню Пацейкаўскага сельскага выканаўчага камітэта мы выбіраць не будзем, таму спыніліся на дырэктару фірмы “ТэхнаГлоубІндастры” з ЛДПБ 1982 года нараджэння.

Кандыдат-спойлер: Людміла Ніжэвіч 

vybory2019.by

Фаварыт — цяперашняя дэпутатка Палаты прадстаўнікоў.

 

Слуцкая выбарчая акруга № 67

Анатоль Юрэвіч 

vybary2019.by

Ад Слуцка Еўрарадыё абірае немаладога, але адзінага прадстаўніка апазіцыі — сябра БСДП (Грамада) 1960 года нараджэння, які часова не працуе.

Кандыдат-спойлер: Валянціна Ражанец

vybary2019.by

Але выйграць выбары ён наўрад ці зможа. Яму ды іншым кандыдатам супрацьстаіць дзейны дэпутат Палаты прадстаўнікоў, таму ў Слуцку, на жаль, без варыянтаў.

Сапернікі: начальнік слуцкага філіяла “Белпошты” і намеснік дырэктара фірмы з ЛДПБ.

 

Салігорская гарадская акруга № 68

Вадзім Балаеў

vybary2019.by

Тут нашу ўвагу прыцягнуў толькі беспартыйны індывідуальны прадпрымальнік 1989 года нараджэння. Акрамя яго і праўладнага кандыдата, у Салігорску балатуюцца ў дэпутаты яшчэ дырэктар фірмы з ЛДПБ і дырэктар гарадскога Палаца культуры. 

Кандыдат-спойлер: Андрэй Струнеўскі 

vybary2019.by

Старшыня пярвічнай прафсаюзнай арганізацыі “Беларуськалія”. Ён, хутчэй за ўсё, і стане дэпутатам.

Салігорская сельская выбарчая акруга № 69

Ігар Сечка 

vybary2019.by

У Салігорскім раёне мы вагаліся паміж дырэктарам школы і намеснікам дырэктара фірмы “ДрэваБай” з ЛДПБ. Спыніліся на апошнім, таму што нам падаецца, што ён будзе менш бязвольным націскальнікам на кнопку ў адрозненне ад сталай педработніцы. 

Кандыдат-спойлер: Юлія Мурына

vybary2019.by

Але ў гэтай акрузе ёсць ужо дасведчаны націскальнік, і таму ўладзе няма патрэбы мяняць таго, хто ўжо добра сябе праявіў. З яе пункту гледжання. А гэта цяперашні дэпутат Палаты прадстаўнікоў Юлія Мурына.

 

Стаўбцоўская выбарчая акруга № 70

Мікалай Лысёнкаў

zapraudu.info

У Стаўбцах ёсць неблагі кандыдат ад апазіцыі — індывідуальны прадпрымальнік з БСДП (Грамада) 1979 года нараджэння. Яго і выбіраем.

Кандыдат-спойлер: Іван Мамайка 

vybory2019.by

Але перамога будзе, магчыма, за начальнікам аддзела ўнутраных спраў Стаўбцоўскага райвыканкама.

Іх сапернікі: прадпрымальнік з ЛДПБ і дырэктар Стаўбцоўскай ПМК.

 

Дзяржынская выбарчая акруга № 71

Андрэй Дзмітрыеў 

euroradio.fm

Тут наш выбар відавочны — гэта сустаршыня ГА “Гавары праўду”.

Кандыдат-спойлер: Аляксандр Саракач 

vybory2019.by

А найбольш імаверны пераможца выбараў — старшыня Дзяржынскага раённага Савета дэпутатаў.

Адзіны, хто мог бы стварыць яму канкурэнцыю, — першы сакратар раённага БРСМ. Таксама тут балатуецца дырэктар будаўнічай фірмы з ЛДПБ.

 

Маладзечанская гарадская выбарчая акруга № 72

Валянцін Цішко 

vybory2019.by

У Маладзечне шанцаў ні ў кога няма, але, на наш погляд, было б няблага, каб у парламент прайшоў сябра АГП 1989 года нараджэння. І хаця адміністратар гандлёвай залы крамы “Мінск Крышталь” не выглядае сур’ёзным кандыдатам, усё ж ён прадстаўляе апазіцыю і ўзрост у яго далёкі ад пенсійнага.

Кандыдат-спойлер: Людміла Канановіч 

vybory2019.by

На другі тэрмін адсюль пойдзе дзейны дэпутат Палаты прадстаўнікоў 1966 года нараджэння. 

Трэці кандыдат у акрузе — дырэктар завода “Рамбыттэхніка”.

 

Маладзечанская сельская акруга № 73

Людміла Каханоўская

vybary2019.by

Ад Маладзечанскага раёна Еўрарадыё адправіла б у парламент абараняць правы бюджэтнікаў старшыню раённай арганізацыі прафсаюза работнікаў адукацыі і навукі.

Кандыдат-спойлер: Алег Семянчук 

vybory2019.by

Больш выгадным для ўлады, аднак, выглядае дасведчаны чыноўнік 1958 года нараджэння — старшыня камітэта па працы, занятасцi i сацыяльнай абароне Мiнскага абласнога выканаўчага камітэта. Пасядзіць у парламенце некалькі гадоў і атрымае дэпутацкую пенсію. Бінга!

Іншыя кандыдаты: пенсіянер з апазіцыйных камуністаў і дырэктар аж трох прыватных фірмаў з ЛДПБ.

 

Вілейская выбарчая акруга № 74

Мікалай Юшчук

vybory2019.by

Адзіны апазіцыйны кандыдат у дэпутаты на Вілейшчыне — вядучы інжынер па ахове працы фірмы “ОП НДІ ПКД”, якая займаецца вытворчасцю дзвярэй, акон і іншых вырабаў са шкла. Яму 45 гадоў, ён сябра БСДП (Грамада). 

Кандыдат-спойлер: Ірына Супрановіч

Фота з сацсетак.

На два гады за яго старэйшая фаварытка перадвыбарнай гонкі — старшыня Крывасельскага сельскага выканаўчага камітэта з праўладнай Камуністычнай партыі Беларусі.

Змагаюцца з імі загадчык філіяла дарожна-будаўнічага ўпраўлення, пенсіянер-камуніст і чыноўнік Крупскага райвыканкама. 

 

Лагойская акруга № 75

Ілля Дабратвор і Алена Пятрэнка

vybory2019.by

У Лагойску ёсць, на першы погляд, добры апазіцыйны кандыдат. Ілля Дабратвор індывідуальны прадпрымальнік, шматдзетны бацька. Аднак ёсць некаторыя рэчы, якія ад яго адштурхоўваюць: напрыклад, ён публікуецца на прарасійскіх сайтах кшалту “Палітрынга”, выступае за ўвядзенне падатку на бяздзетных і інш. Таму мы вырашылі падтрымаць тут адразу абодвух апазіцыйных кандыдатаў, гэта значыць яшчэ і індывідуальную прадпрымальніцу з АГП Алену Пятрэнка.

Кандыдат-спойлер: Пётр Вабішчэвіч 

vybory2019.by

Як бы там ні было, выйграе выбары, хутчэй за ўсё, дзейны дэпутат Палаты прадстаўнікоў і сябра Камуністычнай партыі Беларусі Пётр Вабішчэвіч. 

Іншыя кандыдаты: камуністка, якая не працуе, дырэктар камунальнага прадпрыемства і дырэктар фірмы з ЛДПБ.

Сеніцкая выбарчая акруга № 76

Аляксандр Малашка 

vybory2019.by

Яшчэ аднаго апазіцыянера мы вылучылі б з Сеніцкай акругі. Гэта дырэктар СТА 1968 года нараджэння з Аб’яднанай грамадзянскай партыі.

Кандыдат-спойлер: Мікалай Улаховіч

vyboy2019.by

Але ж і тут ёсць цяперашні дэпутат Палаты прадстаўнікоў, які ідзе на другі тэрмін.

Сапернікі: дырэктар каледжа, дырэктар цэнтра дзіцячага развіцця і дырэктар зарэгістраванай у Расіі фірмы з ЛДПБ.

 

Заслаўская выбарчая акруга № 77

Вольга Краўцова 

vybory2019.by

З Заслаўя Еўрарадыё прапануе ў парламент прадстаўніцу Беларускай партыі "Зялёныя" 1991 года нараджэння. Акрамя таго што яна эколаг, Вольга Краўцова яшчэ юрыст — працуе вядучым юрысконсультам кампаніі “АЛАДЭН”.

Кандыдат-спойлер: Валянціна Курсевіч

vybory2019.by

Асноўная саперніца ў яе вельмі моцная, прайсці яе наўрад ці атрымаецца. Гэта дэпутатка Палаты прадстаўнікоў, якая ідзе на другі тэрмін і яго напэўна атрымае.

Іншыя кандыдаты: яшчэ адна юрыстка з АГП, прадпрымальнік з БСДП (Грамада), намеснік кіраўніка філіяла “Мінаблдарбуда” і пенсіянер з ЛДПБ.