Выбары 2019: парламент мары vs рэальны прагноз Еўрарадыё — Гродзенская вобласць
Сёлетняя парламенцкая кампанія такі крыху здзівіла аматараў прагнозаў. Апазіцыйныя дэпутаткі Алена Анісім і Ганна Канапацкая, якім прадказвалі працяг дэпутацкіх мандатаў, нават не былі зарэгістраваныя ў якасці кандыдатак! І ўсё ж Еўрарадыё рызыкне зрабіць свой прагноз. Але крыху іншым чынам.
Мы ўважліва вывучылі спіс кандыдатаў, улічылі самаадводы і “чырвоныя карткі” ад выбарчых камісій і найперш вызначыліся з тымі, за каго б самі прагаласавалі ў кожнай з акруг. Пераважная большасць фаварытаў — маладыя, адукаваныя, дзёрзкія — з якімі Палата прадстаўнікоў ажыла б. Але ёсць і старая гвардыя — кандыдаты з вялікім кандыдацкім досведам.
Увага! Выбар рэдыкцыі можа не супадаць з канчатковым рашэннем Цэнтрвыбаркама! Таму мы вызначылі і 110 кандыдатаў, якія, на нашую думку, маюць найбольшыя шанцы быць абранымі ў дэпутаты (у тэксце яны пазначаныя як кандыдаты-спойлеры). Шукайце сваю акругу — а далей вашая справа: пагаджацца з нашым выбарам ці не!
Гродзенская вобласць:
Ваўкавыская выбарчая акруга № 48
Павел Коўшаль
Намеснік дырэктара па вытворчасці прыватнай фірмы “Зілант”, сябра ЛДПБ, хлопцу толькі 29 гадоў. Маладосць і запал гарантаваныя!
Кандыдат-спойлер: Павел Паканечны
Адзін прадстаўнік МНС праходзіць у Брэсцкай вобласці, будзе ў парламенце і яго калега з Гродзенскай — начальнік Ваўкавыскага райаддзела па надзвычайных сітуацыях 1971 года нараджэння.
Іх сапернікі: пенсіянер з БСДП (Грамада), загадчык кавярні, ІП і камуніст — дырэктар фірмы.
Гродзенская-Занёманская выбарчая акруга № 49
Жанна Гасцяева
Кандыдатка не толькі юрыст, старшыня прававога цэнтра дапамогі спажыўцам, але і сябра партыі “Зялёныя”. Добры набор скілаў для дэпутата!
Кандыдат-спойлер: Ірына Луканская
Фаварыт у акрузе, на наш погляд, — галоўны ўрач гродзенскай дзіцячай паліклінікі № 1 1965 года нараджэння.
Іншыя прэтэндэнты: пенсіянерка, педагог-прадпрымальнік і дырэктар кавярні.
Гродзенская-Кастрычніцкая акруга № 50
Яўген Дудкін
І зноў Еўрарадыё прасоўвае маладзёна! Індывідуальны прадпрымальнік 1989 года нараджэння прадстаўляе апазіцыйную Аб’яднаную грамадзянскую партыю.
Кандыдат-спойлер: Алена Патапава
Найбольш імаверны пераможца ў гэтай акрузе — намеснік генеральнага дырэктара мэблевай фабрыкі “ЗОВ”.
Іншыя кандыдаты: прадавец, два інжынеры і адзін беспартыйны ІП.
Гродзенская-Цэнтральная выбарчая акруга № 51
Алена Шаламіцкая
Тут увагу Еўрарадыё прыцягнула толькі маладая маці 1988 года нараджэння, якая знаходзіцца ў дэкрэтным адпачынку. Магчыма, яна зможа дапамагчы дэпутатам больш займацца праблемамі дзяцей.
Кандыдат-спойлер: Лілія Кір’як
Безумоўны фаварыт, аднак жа, ёсць і ў гэтай акрузе: дзейны дэпутат Палаты прадстаўнікоў, напэўна, увогуле не бачыць для сябе канкурэнтаў.
Іншыя сапернікі: дырэктар завода, беспрацоўны, кантралёр з “Гродна-Азота” ды рамеснік.
Гродзенская-Ленінская выбарчая акруга № 52
Руслан Красічкаў
У гэтай акрузе нас не прывабіў ніводзін з кандыдатаў, а беспартыйнага рамесніка 1973 года нараджэння мы абралі сваім фаварытам рандомам.
Кандыдат-спойлер: Тамара Даўгашэй
На фоне “ніякіх” сапернікаў будучая перамога цяперашняй дэпутаткі Палаты прадстаўнікоў выглядае больш чым упэўненай.
Таксама балатуюцца тут інжынер і настаўнік дапрызыўнай падрыхтоўкі.
Гродзенская сельская выбарчая акруга № 53
Максім Губарэвіч
Вядомы апазіцыянер з Партыі БНФ, працуе спецыялістам па продажах. Максім змагаецца з рэжымам больш за 10 гадоў, хай бы паспрабаваў перайсці з вуліцы ў парламент.
Кандыдат-спойлер: Аляксандр Аўтко
Праўладным фаварытам мы лічым першага намесніка гендырэктара агракамбіната “Скідзельскі”. Але 100% яму не дамо. Можа, і будуць шанцы ў Максіма?
Іншыя кандыдаты: яшчэ адзін прадажнік і дырэктар цэнтра перакваліфікацыі.
Іўеўская выбарчая акруга № 54
Алег Дубіцкі
Хай у парламенце будзе больш спартсменаў! У Іўі Еўрарадыё галасуе за спартсмена-інструктара рэспубліканскага цэнтра алімпійскай падрыхтоўкі. Да таго ж хлопцу ўсяго 29 гадоў.
Кандыдат-спойлер: Аляксандр Маркевіч
Ці ёсць у Алега шанц? Наўрад. Гэта вам пацвердзіць дзейны дэпутат Палаты прадстаўнікоў Аляксандр Маркевіч.
Трэці кандыдат — рамеснік з АГП.
Лідская выбарчая акруга № 55
Аляксандр Панасевіч
Тут мы таксама выбіралі сабе любімчыка з дапамогай рулеткі. Чаму? Чытайце ніжэй. А пра Аляксандра скажам толькі, што ён 1977 года нараджэння, па спецыяльнасці аграном.
Кандыдат-спойлер: Валерый Міцкевіч
У Лідзе кандыдат-спойлер больш чым сур’ёзны: намеснік кіраўніка Адміністрацыі прэзідэнта і старшыня Беларускага рэспубліканскага саюза юрыстаў пройдзе ў парламент на 100 адсоткаў.
Пералічваць іншых кандыдатаў сэнсу няма.
Нёманская выбарчая акруга № 56
Сяргей Альшэўскі
Гэты індывідуальны прадпрымальнік з АГП шмат у каго на слыху. Сяргей сур’ёзна занепакоены вырашэннем праблем у галіне адукацыі і не толькі і пастаянна з’яўляецца ў сродках масавай інфармацыі, уключаючы Еўрарадыё.
Кандыдат-спойлер: Уладзімір Сіняк
Галоўны яго сапернік, на нашу думку, — намеснік гендырэктара па будаўніцтве дзяржаўнага “Гроднааблгаза”.
Іншыя сапернікі: рабочы “Гродна-Азота” і камуніст — дырэктар фірмы.
Замкавая выбарчая акруга № 57
Дзмітрый Арцюх
Малады гісторык, якому няма яшчэ і 30 гадоў, дырэктар Карэліцкага раённага краязнаўчага музея змог бы, напэўна, супрацьстаяць спробам перапісвання гісторыі і расійскай, напрыклад, прапагандзе.
Кандыдат-спойлер: Аляксандр Сангін
Начальнік галоўнага ўпраўлення адукацыі Гродзенскага аблвыканкама дакладна выглядае для ўлады лепшым за гісторыка і рабочага мясакамбіната, які таксама балатуецца ў Замкавай акрузе.
Слонімская выбарчая акруга № 58
У Слоніме ажно сем кандыдатаў, а мы выбралі намесніка кіраўніка “Гроднамясамалпрама” 1979 года нараджэння Віталя Гудзя. Крэпкі хазяйственнік!
Кандыдат-спойлер: Валянцін Семяняка
Аднак яшчэ крапчэйшым выглядае старшыня Зэльвенскага раённага Савета дэпутатаў.
Астатнія слонімскія кандыдаты: слесар-камуніст, вартаўнік лясгаса, прафсаюзны дзеяч, дырэктар прыватнай фірмы і камуніст-прадпрымальнік.
Смаргонская выбарчая акруга № 59
Ірына Вештард
У Смаргоні кандыдат Еўрарадыё Ірына Вештард. Яна ўжо пенсіянерка (1953 года нараджэння), намесніца старшыні Беларускай сацыял-дэмакратычнай партыі (Грамада).
Кандыдат-спойлер: Віктар Свіла
Выйграе ж выбары, хутчэй за ўсё, намеснік старшыні Астравецкага райвыканкама.
Таксама тут балатуюцца пенсіянер з АГП і сацыяльны работнік — камуніст.
Шчучынская выбарчая акруга № 60
Дзмітрый Цеслянок
У Шчучыне Еўрарадыё абрала б дэпутатам прамысловага альпініста, сябра БСДП (Грамада).
Кандыдат-спойлер: Павел Міхалюк
Як нам падаецца, улады таксама не супраць крыху амаладзіць парламент. Таму ад Шчучына ў Палату прадстаўнікоў, хутчэй за ўсё, трапіць правераны баец БРСМ, першы сакратар гродзенскага абласнога камітэта беларускай версіі камсамола.
Іх сапернікі: інжынер, дырэктар невялікага дзяржпрадпрыемства і сацыяльная работніца.
