Новыя звесткі аб выбарчых фондах — найбольшы ў Гайдукевіча

19 жніўня Цэнтрвыбаркам апублікаваў абноўленыя звесткі аб памерах выбарчых фондаў. На гэтую дату толькі шэсць з васьмі штабоў завялі неабходныя рахункі — па-ранейшаму фондаў няма ў Анатоля Лябедзькі і Аляксандра Лукашэнкі.

Самы вялікі выбарчы фонд на 19 жніўня ў Сяргея Гайдукевіча — 12 мільёнаў 600 тысяч (выкарыстана 0 рублёў). На другім месцы ідзе Таццяна Караткевіч з 12 мільёнамі 320 тысячамі. Яна таксама гэтымі грашыма пакуль не карысталася. Амаль не адстае ад Караткевіч Сяргей Калякін — 12 мільёнаў 95 тысяч. Аднак ён выкарыстаў 7 мільёнаў 106 тысяч.

10 мільёнаў 600 тысяч назбіраў Віктар Цярэшчанка (выкарыстаў 9 мільёнаў 500 тысяч). 144 тысячы рублёў было ў фондзе Жанны Раманоўскай: яны выкарыстаныя цалкам. Мікалай Улаховіч назбіраў усяго 100 тысяч, аднак да іх пакуль не дакранаўся.

Выбары прэзідэнта Беларусі пройдуць 11 кастрычніка. Рэгістрацыя кандыдатаў прызначаная на пачатак верасня.