Мельнікава ў Беларусі — што адбываецца? Меркаванне Брухана, Жыгара, Кавалеўскага

Кожны чалавек, паглядзеўшы навіны, зрабіў для сябе нейкія высновы. Але ці была яна завербавана? Як яна была завербавана? Калі гэта адбылося? Пад ціскам? Не пад ціскам? Адказаў на гэтыя пытанні няма. Ці добраахвотна яна ўвогуле зрабіла гэтыя здымкі? Чалавека ж маглі і прымусіць іх зрабіць. Пакуль не будуць раскрыты ўсе абставіны, мы можам толькі дадумваць, а не базіравацца на фактах.

Сам фотаздымак да маёй ацэнкі падзей не дадаў нічога новага. Гэта хутчэй аднаўленне тэмы знікнення Анжалікі Мельнікавай. Паглядзім, што прыдумае прапаганда.

Валер Кавалеўскі, палітык: Выклікаюць пытанні вынікі расследавання спецслужбаў Польшчы

— Мне было цікава паглядзець на вынікі расследавання спецслужбаў Польшчы адносна знікнення іх уласнай грамадзянкі [Мельнікава мае грамадзянства Польшчы, — Еўрарадыё]. І за ўвесь час яны зрабілі адзіную выснову — яна ахвяра, і трэба звяртацца да беларускага боку па інфармацыю пра яе месцазнаходжанне.

Мне здавалася, што гэта павінен быць першы крок — спытацца, ці ёсць у вас на тэрыторыі Беларусі гэтая грамадзянка, бо мы хвалюемся праз тое, што яна знікла.

Выглядае, што ён дагэтуль не быў зроблены, што гэты крок будзе зроблены толькі на другі год расследавання! Гэта выклікае трохі пытанняў пра тое, як вялося гэтае расследаванне, і наколькі яно было актыўным.

Уладзімір Жыгар, прадстаўнік BELPOL: 99,9%, што на фота Мельнікава, але гэта нічога не даказвае

— Калі нам даслалі фота, мы праверылі яго праз нашу сістэму распазнавання твараў. Сістэма вызначыла, што на 99,9% на здымку Мельнікава. Іншае пытанне, што мы не ведаем, ці было гэтае фота апрацавана штучным інтэлектам або чымсьці падобным.

Калі каментаваць размову журналістаў з яе бацькам, то трэба проста шчыра сказаць: вы размаўляеце з чалавекам, які адназначна знаходзіцца ў Беларусі, і адназначна знаходзіцца пад кантролем, пад уплывам, і можа атрымліваць рознага кшталту каштоўныя ўказанні ад беларускіх спецслужбаў. Тэлефанаваць гэтаму чалавеку і спрабаваць даведацца праз яго нейкую праўду — гэта зусім безнадзейная справа. Бацькі будуць казаць тое, што ім сказалі казаць.

Праўда гэта, няпраўда гэта, адпавядае гэта рэчаіснасці ці не адпавядае — у цяперашні час даведацца немагчыма.
На гэты момант у нас няма ніякіх адказаў. Ёсць толькі нейкія фатаграфіі і заявы бацькоў. Фатаграфіі можна падрабіць вельмі праўдападобна, і якасць можа быць адпаведнай. Да слоў бацькоў трэба ставіцца вельмі асцярожна.

Што ж датычыцца польскага расследавання, то тут ёсць пэўныя працэсуальныя моманты. Калі разглядаць гэта як справу аб знікненні чалавека, то пра яго знікненне павінны заявіць найбліжэйшыя сваякі. Калі месцазнаходжанне будзе выяўлена, а чалавек скажа, што ў яго ўсё ў парадку, і папросіць зняць сябе з разыскных спісаў, яго больш ніхто шукаць не будзе, і ніякай інфармацыі нават блізкім сваякам не перададуць. Таму з такім пытаннем трэба звяртацца непасрэдна ў праваахоўныя органы Польшчы.

Што кажуць у пракуратуры?

Еўрарадыё звярталася ў пракуратуру Польшчы з пытаннем пра ход расследавання. Вось што нам адказалі ў сярэдзіне сакавіка, калі меркаваныя фота Мельнікавай яшчэ не былі апублікаваны:

— На падставе інфармацыі, прадастаўленай пракурорам, які вядзе справу, паведамляем, што ў інтарэсах папярэдняга расследавання і ў сувязі з яго цяперашнім этапам немагчыма прадастаўляць падрабязную інфармацыю аб следстве або яго напрамках.