Пракурор просіць асудзіць экс-памочніка Лукашэнкі на 12 гадоў

Да завяршэння набліжаецца суд па "справе малочнікаў". Па ёй жа судзяць і былога міністра сельскай гаспадаркі (2022-2023) і памочніка Лукашэнкі па Віцебскай вобласці (2023) Ігара Брыло. Пракуратура просіць для яго 12 гадоў пазбаўлення волі, даведалася "Наша Ніва".

"Справа малочнікаў" пачалася ў лістападзе 2023‑га з арышту Ігара Брыло. Неўзабаве пасля таго была затрыманая амаль уся сям'я кіраўніка "Бабулінай крынкі" Генадзя Скітава, а таксама менеджмент малочнага холдынга.

Паведамлялася, што Скітавы пры спрыянні Брыло арганізавалі на дзяржаўнай "Бабулінай крынцы" сістэму, пры якой штучна ўтваралася затаваранасць складоў. У выніку прадукцыю адпускалі па ніжэйшай цане — для разгрузкі складоў. Потым малако разам з іншай прадукцыяй па дэмпінгавых цэнах пастаўлялі фірмам-пасярэднікам, а тыя прадавалі тавар у Расіі па рэальнай цане. Розніца дзялілася паміж удзельнікамі схемы.

Брыло актыўна супрацоўнічаў са следствам, а Скітаў адмовіўся даваць паказанні. Суд па "справе малочнікаў" пачаўся ў верасні 2025‑га.  

Як піша "Наша Ніва", Генадзю Скітаву пракуратура просіць 13 гадоў зняволення. Такім жа тэрмінам яму пагражала следства, калі ён не прызнае віну.