У Беларусі недастаткова экскурсаводаў — Нацагенцтва па турызме

У Беларусі нестае экскурсаводаў. Пра гэта журналістам заявіў дырэктар Нацыянальнага агенцтва па турызме Дзмітрый Марозаў, перадае тг-канал "Позірк".

На сёння ў Беларусі працуе каля 1200 экскурсаводаў, кажа Марозаў. Прычым каля 150 з іх былі атэставаныя ў 2023 годзе. Сертыфікат экскурсавода дзейнічае пяць гадоў.

Па словах Марозава, апошнім часам з'явілася шмат новых праграм па населеных пунктах — Маладзечна, Жлобін, Салігорск. Гэта ўжо зацверджаныя тэксты экскурсій, па якіх любы ахвочы можа "стаць экскурсаводам".

Як распавядала Еўрарадыё, 4 ліпеня Міністэрства спорту і турызму выпусціла пастанову №33. У дакуменце гаворыцца, што экскурсаводы не павінны дапускаць "з боку турыстаў, экскурсантаў" і іншых асоб некарэктных "выказванняў або дзеянняў".

Раней урад забараніў працаваць экскурсаводамі тым, каго затрымлівалі і судзілі па "пратэсных" артыкулах. За апошнія гады шэраг беларускіх экскурсаводаў зазналі палітычныя рэпрэсіі з боку ўладаў.