Рыжская дума падтрымала ініцыятыву пра сквер імя Францішка Скарыны
![Францішак Скарына](/sites/default/files/styles/gallery_main/public/2023-11/frs.jpg.webp?itok=OosJjIFf)
Францішак Скарына / wikimedia.org
Рыжская дума падтрымала ініцыятыву пра сквер імя Францішка Скарыны (1486 — 1551), беларускага першадрукара і асветніка. За яе прагаласавалі 50 дэпутатаў з 60, паведамляе riga.lv. Ініцыятарамі былі дырэктар Нацыянальнай бібліятэкі Латвіі Андрыс Вілкс і прадстаўнікі беларускай дыяспары Вячка Целеш і Дзяніс Давыдаў. Летам яны разам з прадстаўніцай па нацыянальным адраджэнні Аб'яднанага Пераходнага Кабінета Беларусі Алінай Коўшык сустракаліся з уладамі горада і дасягнулі паразумення па гэтым пытанні. Восенню назву ўхваліў Камітэт па развіцці горада Рыгі.
Кіраўніца Аб'яднанага Пераходнага Кабінета Святлана Ціханоўская размаўляла пра гэты праект з мэрам Рыгі Вілнісам Кірсісам. У прыватнасці, гаворка ішла пра тое, каб беларускія мастакі паўдзельнічалі ў афармленні сквера.
Імя беларускага першадрукара будзе насіць "добраўпарадкаваная тэрыторыя ля астраўнога моста, размешчанага паміж вуліцамі Dagdas і Maskavas". Дэпартаменту гарадскога развіцця даручана забяспечыць змяненне адрасоў, а ўпраўленню па добраўпарадкаванні тэрыторыі набыць і размясціць новыя паказальнікі назваў.
![Рыжская дума падтрымала ініцыятыву пра сквер імя Францішка Скарыны](/sites/default/files/styles/default_image_paragraph/public/paragraphs/image/333_27.jpg.webp?itok=fJDeqeGM)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.