Аб'явіўся збеглы з Бішкека Бакіеў: піша е-мэйлы і раздае інтэрв'ю

Часовы ўрад на чале з Розай Атунбаевай, які сфармавала апазіцыя, кантралюе чатыры паўночныя вобласці Кыргызстана, уключна з сталіцай. Паведамляецца, што пад ягоны кантроль перашгла міліцыя, войска і памежныя службы. За паўгода часовы ўрад плануе прыняць новую рэдакцыю Канстытуцыі і Кодэкс аб выбарах.

Расія фактычна падтрымала часовы ўрад – прэм'ер-міністр Уладзімір Пуцін паразмаўляў па тэлефоне з Розай Атунбаевай і заявіў, што Расія гатовая матэрыяльна дапамагчы Кыргызстану, паведаміў "Інтэрфакс". ЗША больш асцярожныя, але сына Бакіева Максіма на загадзя запланаваным форуме ў Вашынгтоне не прынялі.

Сітуацыя ў сталіцы Кыргызстана па-ранейшаму неспакойная: сёння на яго вуліцах абясшкодзілі другое выбуховае прыстасаванне. Большасць бішкекскіх міліцыянтаў на працу дагэтуль не выйшлі – яны апранутыя ў цывільнае і хаваюцца. Вуліцы гарадоў патрулююць народныя дружыны, абараняючы крамы і музеі ад марадзёраў.

7 красавіка грамадзяне паступова захапілі будынкі парламента, пракуратуры, тэлебачанне і пайшлі на штурм галоўнага будынка ўраду, дзе месціцца працоўны кабінет прэзідэнта.

Унутраныя войскі паспрабавалі спыніць раззлаваны натоўп зброяй. Па сведчаннях кыргызскіх праваабаронцаў, на плошчы у людзей стралялі баявымі кулямі снайперы і аўтаматчыкі. Загінулі найменш 75 чалавек, больш за тысячу параненыя.

Пратэстоўцы спачатку былі ўзброеныя толькі камянямі і "кактэйлямі Молатава", але падчас сутычак з ахоўнікамі правапарадку пазабіралі і агнястрэльную зброю. Вайсковымі грузавікамі абураныя грамадзяне ламалі вароты будынку прэзідэнта.

Кыргызская апазіцыя не задаволеная аўтарытарнымі метадамі кіраўніцтва Бакіева, карупцыяй і кланавасцю.

Бакіеў пад прыкрыццём правядзення рэформы дзяржаўнага кіравання ўзмацніў у краіне сваю ўладу. Пасля рэформы прэзідэнт стаў кіраваць усёй замежнай палітыкай, фінансамі краіны фактычна стаў запраўляць яго сын Максім, сілавым блокам – малодшы брат Жаныш. Яшчэ адзін брат Ахмет – бізнэсмэн, дэпутат гарадскога Савета Джалал-Абадскай вобласці (менавіта ў Джалал-Абад збег Бакіеў). Некаторыя называюць яго "ценевым губернатарам вобласці, адзначае інфармацыйнае агенцтва Фергана.ру.

Парадокс палягае ў тым, што сам Бакіеў прыйшоў да ўлады 5 год таму ў выніку так званай "цюльпанавай рэвалюцыі", выступаючы супраць карупцыйнасці мінулага прэзідэнта Аскара Акаева. Але не выканаў свае абяцанні.

"Тыя вынікі, што абвяшчала апазіцыя, не былі выкананыя. Таму зараз усё больш расчаравання ў тых падзеях. І калі будзе такое самае праўленне як пры Акаеве, то можа здарыцца падобнае", - напрарочыў лёс рэжыма Бакіева год таму кіргізскі палітолаг Марат Казакпаеў у інтэрв'ю тэлеканалу "Стан-ТВ".

Дарэчы, усяго тыдзень таму гэты канал патрапіў пад зачыстку бакіеўскім рэжымам няўгодных СМІ – фінансавая паліцыя абвінаваціла журналістаў у тым, што яны карысталіся неліцэнзійнымі камп’ютарнымі праграмамі.

За мінулыя месяцы ўлады зачынілі ў краіне шэраг апазіцыйных газет, заблакавалі мясцовыя і міжнародныя інфармацыйныя агенцтвы. Шэраг вядомых журналістаў ды апазіцыянераў былі жорстка пабітыя і нават забітыя невядомымі. Апазіцыя вінаваціла ў гэтых выпадках улады.

Будаўніцтва жорсткай вертыкалі і метады працы з апазіцыяй і СМІ былі паспяхова перанятыя Бакіевым у суседніх краін Цэнтральнай Азіі – Узбекістана, Туркменістана і Таджыкістана, адзначае Фергана.ру.

Каманда Бакіева пераацаніла свае сілы пасля яго ўпэўненай перамогі на прэзідэнцкіх выбарах 2009 года. Афіцыйна ён займеў больш за 70%, але незалежныя назіральнікі заявілі, што адбыліся значныя фальсіфікацыі. Улады не пралічылі наступствы пачатай эканамічнай рэформы, у выніку якой значна павялічыліся камунальныя плацяжы і недаацанілі пратэстны патэнцыял насельніцтва.