“У вас быў час на тое, каб з’ехаць”. Ці можа Польшча закрыць мяжу з Беларуссю?

25/07/2024 - 17:46

Беларуска-польская мяжа / s13.ru

Нават калі сітуацыя з легалізацыяй беларусаў у Польшчы ўскладніцца, міф пра тое, што палякі заўсёды дапамагаюць людзям, якіх пераследуе рэжым, застанецца. Пра гэта ў эфіры Еўрарадыё кажа Міхал Патоцкі — палітычны аглядальнік выдання Dziennik Gazeta Prawna.

— Умовы легалізацыі беларусаў у Польшчы ўсё ж больш ліберальныя, чым у большасці краін Еўрасаюза, нават калі параўнаць з Літвой, — кажа эксперт. — Нават калі будуць нейкія ўскладненні, думаю, і далей легалізавацца ў Польшчы будзе прасцей, чым у іншых краінах.

Трэба сказаць, што з пункту гледжання Польшчы, людзям, якіх пераследуюць, трэба дапамагаць. Асабліва, калі мы кажам пра суседзяў. Гэтага не спыніць, і так будзе заўсёды. Асабліва, мне так здаецца, калі справа тычыцца стаўлення да беларусаў.

Тым не менш, сітуацыя ў свеце пагаршаецца. Беларусы хвалююцца, што аднойчы палякі закрыюць мяжу, і тады мільёны грамадзян нашай краіны, якія засталіся на Радзіме і не падтрымліваюць рэжым Лукашэнкі, апынуцца ў ягонай пастцы.

— Такое таксама магчыма, — працягвае Міхал Патоцкі. — Калі дойдзе да закрыцця мяжы для грамадзян, аргумент “у вас было чатыры гады на тое, каб з’ехаць” будзе ўжывацца. У прынцыпе, з аднаго боку, так і ёсць. Сістэмны пераслед пачаўся, сімвалічна скажам, у жніўні 2020 года.

Калі еўрапейцы закрываюць межы і ўводзяць санкцыі, якія працуюць супраць звычайных беларусаў, частка грамадзян пачынае адварочвацца ад Захада і ўсё часцей глядзець у бок усходніх суседзяў. Маўляў, у Расіі — і адукацыя, і праца. Навошта біцца з ветракамі? Ці разумеюць гэта ў Польшчы?

— Адна справа — тое, што ёсць, іншая — тое, што кажуць палітыкі. Закрыццё мяжы для грамадзян будзе апошнім крокам, але ён магчымы. Шлях да эскалацыі мае некалькі этапаў, але мы пагаворым пра гэта, калі да гэтага дойдзе. І я спадзяюся, што да гэтага не дойдзе.

Са слоў Міхала, аргумент “Еўропа сама адштурхоўвае ад сябе беларусаў” натуральна ўлічваецца ў Польшчы, але аргумент бяспекі ўсё ж больш пераважвае.

— Гэты аргумент усё больш прысутны, калі прымаюцца рашэнні. Асабліва пасля 2022 года. І, канешне, гэта тычыцца практычна ўсіх відаў санкцый, якія адбіваюцца на простых людзях.