ПрапагандаDaily: генацыд беларусаў за грошы НАТА і Бабарыка на службе Захаду

Віктар Бабарыка і беларуская алігархія рвуцца да захопу ўлады

Але не каранавірусам адзіным. На сайтах, якія мімікруюць пад беларускія рэгіянальныя выданні, істотна павялічылася колькасць публікацый пра будучыя прэзідэнцкія выбары.

Сяргей Іваннікаў на сайце "Витьбич" разбірае нядаўняе інтэрв'ю Віктара Бабарыкі сайту "Салідарнасць" — тое самае, дзе тады яшчэ кіраўнік Белгазпрамбанка разгаварыўся адкрыта пра "дзяржаву-паразіт". Артыкул выйшаў па гарачых слядах інтэрв'ю — за дзень да таго, як Бабарыка абвясціў пра свае прэзідэнцкія амбіцыі.

Пакуль газета Адміністрацыі прэзідэнта "СБ. Беларусь сегодня" ледзь не адкрытым тэкстам піша, што Віктар Бабарыка — стаўленік Масквы, "Витьбич" бачыць у ім капіталіста, неаліберала і нацыяналіста. Калі б гэты тэкст выйшаў пасля заявы Бабарыкі пра вылучэнне ў кандыдаты, то яго можна было б разглядаць як частку хітрай шматхадовачкі, каб адвесці падазрэнні ў прарасійскасці.

Іваннікаў бачыць у Бабарыку прадстаўніка беларускага "найвышэйшага класа", які ўплывае на палітыку краіны:

"Не варта сумнявацца, што і прэзідэнт краіны лічыць банкіра часткай сваёй палітычнай абоймы, давярае яму і даручае вельмі адказныя справы", — лічыць Іваннікаў. І хоць Віктар працаваў на банк расійскага "Газпрама", аўтар "Витьбича" не знаходзіць у ім сімпатый да ідэй "рускага свету". Затое сімпатыі да "беларускага нацыяналізму" адшуквае.

Ну а як жа? Поўны збор кніг Святланы Алексіевіч на беларускай мове Белгазпрамбанк фінансаваў? Фінансаваў. Званне "Мецэнат беларускай культуры" Бабарыка атрымліваў? Атрымліваў. Любую праяву беларускага па-за савецкім дыскурсам або прарасійскімі настроямі аўтар артыкула разумее як празаходнюю і "сапсаваную польскую".

За "рэвалюцыйнымі фразамі" з інтэрв'ю Іваннікаў бачыць выразны "аранжавы след". Асаблівы падтэкст ім надаюць прэзідэнцкія выбары, якія насоўваюцца і на якіх "чарговы раз мясцовай апазіцыі нічога не свеціць". Але асноўнае дзейства разгорнецца восенню.

"З пункту гледжання ўкраінскіх аранжавых, гэта — найлепшы час для глабальных палітычных змен "рэвалюцыйнага тыпу", — прадракае Іваннікаў. — Сёння на гістарычным гарызонце Беларусі занадта шмат аранжавага колеру. Магчымасць адпрацоўкі ўкраінскага сцэнара на беларускай зямлі як ніколі рэальная".

Праўда, публіцыст не ўдакладняе, пра які менавіта ўкраінскі сцэнар ідзе гаворка. Бо ў Расіі таксама быў свой сцэнар, які прадугледжваў далучэнне Крыма і мясарубку на Данбасе.

Сваімі заявамі Бабарыка гуляе на руку планам амерыканскай дыпламатыі, мэта якой — захоп улады і палітычныя метамарфозы ў Беларусі, лічыць Іваннікаў. Што за змены будуць у такім выпадку ў краіне?

"Беларуская дзяржава будзе перафарматавана такім чынам, што краіна пойдзе па шляху разбурэння сваёй самабытнасці, і вынікам такога руху стане растварэнне краіны ў заходняй эканамічнай і геапалітычнай прасторы".

У такім выпадку Беларусь будзе жыць вартым жалю жыццём лімітрофа з насельніцтвам, якое будзе памяншацца, і тэрыторыяй, якая будзе скарачацца. Але ёсць выйсце — блудная краіна павінна вернуцца ва ўтульнае ўлонне "рускага свету"! Так яна захавае сваю культурную ўнікальнасць і зможа ўстойліва развівацца. Праўда, для беларускай буржуазіі ў "рускім свеце" месца няма. У "Саюзнай дзяржаве" такая з'ява паўстаць не можа. А вось існаванне расійскай буржуазіі хоць і праблематычнае, але магчымае.

У канцы ўсё пераходзіць у прамыя пагрозы. Іваннікаў заяўляе, што любы заходні ўрад, любая заходняя НДА павінны ўсведамляць, што іх дзеянні ў Беларусі з'яўляюцца агрэсіяй супраць Расіі: "Захад павінен разумець, што адзін маленькі беларускі горад для рускага грамадства нашмат важнейшы, чым дзясятак еўрапейскіх сталіц. І любое — відавочнае або схаванае — уварванне Захаду ў межы Рускага свету будзе мець для агрэсара катастрафічныя наступствы".

Варта чакаць, што чым бліжэй будуць выбары, тым мацней у становішчы, якое складваецца, прарасійская прапагандысцкая сетка будзе крычаць пра "аранжавую" пагрозу, пра ўкраінскі сцэнар і драпежны Захад, які хоча зацягнуць да сябе "маленькую" і слабую Беларусь.