Пацыенты з COVID у Барысаве чакаюць сваёй чаргі ў паліклініцы па 6-7 гадзін
Пацыенты чакаюць сваёй чаргі на прыём у паліклініцы Барысава
Да 6-7 гадзін вымушаныя праводзіць у чарзе пацыенты 4-й паліклінікі Барысава, паведамляе рэгіянальны рэсурс. Такія чэргі выстройваюцца да спецыялістаў у "чырвонай зоне", куды прыходзяць людзі з падазрэннем на COVID-19.
У калідорах не хапае месцаў для сядзення і даволі душна. Працэс лячэння ператвараецца ў невыносныя фізічныя пакуты, адзначае адзін з жыхароў Барысава, які і даслаў у рэдакцыю фатаграфіі з калідора паліклінікі. Тыя, хто адказвае за медыцыну, на яго думку, павінны б разабрацца, чаму так адбываецца.
"Але пакуль яны лечацца не так, як простыя грамадзяне, гэтага, мабыць, не адбудзецца", — цытуе медыя жыхара горада.
У Беларусі ў апошнія тыдні назіраецца выбухны рост захворвання. Нават па афцыяцыяльных дадзеных, сутачны прырост новых выпадкаў COVID-19 павялічыўся з 1,5-2 тысяч да 6-8 тысяч. Панядзелак 31 студзеня пачаўся з навіны аб велізарных чэргах, якія ўтварыліся ля паліклінік. Пасля гэтага Міністэрства аховы здароўя дазволіла лекарам ставіць дыягназ "каранавірусная інфекцыя" без правядзення абавязковага тэставання, а самі паліклінікі перавялі на рэжым працы "без выходных".
