Новую серыю "Гульні тронаў" паглядзела 16 млн чалавек
Першая серыя сёмага сезона "Гульні тронаў" працягвае ставіць рэкорды. Па апошніх падліках, на сервісах канала НВО доўгачаканы працяг серыяла паглядзела больш за 16 мільёнаў чалавек. З іх 10,1 млн — гледачы з ЗША, і яшчэ прыкладна 6 млн чалавек — сусветная аўдыторыя.
Пры гэтым у дзень прэм'еры серверы канала "клаліся" двойчы: перад і падчас жывой трансляцыі.
У сваіх падліках НВО не ўлічвае пірацкія запампоўкі і прагляд серыі на іншых рэсурсах. А гэта значыць, што рэальная колькасць праглядаў у разы вышэйшая за афіцыйныя дадзеныя.
"Гульня тронаў" паставіла рэкорд не толькі па колькасці праглядаў, але і па колькасці запісаў у сацыяльных сетках. Толькі карыстальнікі "Твітара" напісалі больш за 2,5 мільёнаў паведамленняў з уражаннямі пра новую серыю. І гэта нягледзячы на тое, што (спойлер!) ніхто з асноўных герояў там і блізка не памірае!
Другая серыя "Гульні тронаў" выходзіць увечары 23 ліпеня.
