Мінгарвыканкам збірае звесткі пра ўкраінцаў, якія працуюць у дзяржструктурах
![Мінгарвыканкам / Еўрарадыё](/sites/default/files/styles/main_image_watermark_/public/2023-08/vykankam-1708.jpg.webp?itok=AsB6Yk7Z)
Мінгарвыканкам / Еўрарадыё
Мінгарвыканкам збірае інфармацыю пра ўкраінцаў, якія працуюць у дзяржструктурах, "незалежна ад даты пераезду ў Рэспубліку Беларусь". Адпаведны запыт чыноўнікі даслалі ў падпарадкаваныя структурныя падраздзяленні, піша Reform.by.
У запыце, які атрымалі дзяржустановы, гаворыцца: "Прашу сёння да 14:00 прадставіць інфармацыю пра грамадзян, якія працуюць у вашай арганізацыі ў якасці асноўнага работніка, месцам нараджэння якіх з'яўляецца Украіна, незалежна ад даты пераезду ў Рэспубліку Беларусь. Форма прадстаўлення інфармацыі прыкладаецца. Інфармацыю прадстаўляць у электронным выглядзе фармаце WORD, на папяровым носьбіце не трэба".
Мэта збору такіх звестак не ўдакладняецца.
Дарэчы, раней такую ж інфармацыю збірала пра сваіх супрацоўнікаў кіраўніцтва Беларускай чыгункі. Пра гэта паведамлялася ў тэлеграм-канале супольнасці чыгуначнікаў у кастрычніку 2022 года. Пасля збору інфармацыі работнікаў, якія нарадзіліся ва Украіне, як паведамлялася, выклікалі ў абласныя ўпраўленні КДБ і распытвалі пра сваякоў ва Украіне і пра стаўленне да вайны.
![Мінгарвыканкам збірае звесткі пра ўкраінцаў, якія працуюць у дзяржструктурах](/sites/default/files/styles/default_image_paragraph/public/paragraphs/image/minharvykankam-1801-2.png.webp?itok=Dgp3tvml)
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.