Мінфін расказаў, чаму нельга ўключыць дарожны падатак у кошт бензіну
Праблему дарожнага падатку вырашыць не могуць ужо некалькі гадоў / pixabay
Мінфін лічыць, што дарожны падатак трэба выплачваць асобна.
Урад ужо некалькі гадоў думае над вырашэннем сітуацыі вакол дарожнага падатку. Цяпер ён "прывязаны" да праходжання ТА, праз што многія аўтаўладальнікі адмаўляюцца ад тэхагляду.
Адзін з найбольш часта прапанаваных варыянтаў — уключыць суму збору ў кошт бензіну. Як кажа намеснік міністра фінансаў Дзмітрый Кійко, такі шлях вырашэння праблемы мае шэраг недахопаў.
— Па-першае, адбудзецца аднаразовы рост цэн на паліва. Па нашых разліках, цана павялічыцца на 10 капеек за літр. Гэта акажа інфляцыйны ціск на эканоміку. Пры гэтым павялічыцца кошт паліва і для тых, хто плаціў дарожны збор, і для тых, хто яго не плаціў. Каб выканаць прынцып справядлівасці, нам трэба будзе вярнуць сродкі тым асобам, якія ўжо ўнеслі аплату, — тлумачыць Кійко, яго цытуе "СБ".
У выніку ў бюджэце будзе створаны буйны "касавы разрыў".
— Пры гэтым варыянце мы таксама страчваем крыніцу папаўнення бюджэту, якая не аказвае інфляцыйнага ціску на эканоміку. У нас сёння сітуацыя нявызначанасці з цаной нафты. У Расійскай Федэрацыі рэалізуецца падатковы манеўр. У выніку штогод адбываецца адноснае падаражэнне нафты. Гэта ўсё выліваецца ў неабходнасць павелічэння цэн на паліва на нашым ўнутраным рынку.
Кійко дадае: калі накласці на тыя ж 10 капеек рост цэн на паліва, выкліканы падатковым манеўрам, то хутка можа быць значны дыспарытэт цэн. У выніку краіна страціць магчымасці транзіту. Адначасова з'явяцца магчымасці "шэрых схем" увозу паліва.
— Аб'ёмы рэалізацыі паліва зменшацца. І з часам гэтая крыніца перастане існаваць, а перавесці яе ў іншы выгляд будзе цяжка. І сёння нам трэба выбіраць, ці хочам мы ў 2024 годзе паліва, якое будзе каштаваць долар за літр, — заключае намеснік кіраўніка Мінфіна.
У цэлым жа Мінфін, па словах Кійко, выступае за тое, каб дарожны збор выплачваўся асобна.
"Прывязалі" дарожны падатак да ТА ў 2014 годзе. Негатыўную рэакцыю аўтаўладальнікаў гэта выклікала практычна адразу. Упершыню пра неабходнасць вырашэння пытання пачалі гаварыць яшчэ ў перадпапярэднім урадзе, за Андрэем Кабяковым. Аднак выхад з сітуацыі так і не быў знойдзены. На нядаўняй нарадзе Аляксандр Лукашэнка даручыў ураду і парламенту самастойна шукаць шляхі вырашэння праблемы, пасля чаго абмеркаванне будучага дарожнага падатку актывізавалася.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.