“Маё любімае слова — “каханне”. Чаму паліглот з Бразіліі вывучыў беларускую мову

Элізеў нарадзіўся ў Бразіліі, але ўжо тры гады жыве ў Польшчы. Ён фаловіць Еўрарадыё ў інстаграме, слухае стэндапы Славы Камісаранкі, а адна з яго ўлюблёных беларускіх спявачак — Паліна.

Элізеў працуе ў IT, гаворыць на больш чым дзесяці мовах і вядзе лінгвістычны падкаст. Мы некалькі разоў перапытваем, не давяраючы сваім вушам, калі ён кажа:

— Я вучу беларускую мову шэсць тыдняў.
— Можа, месяцаў?
— Не-не, тыдняў! — запэўнівае бразілец. — Мая дзяўчына — беларуска, і я вырашыў, што калі я больш даведаюся пра Беларусь, змагу лепей яе разумець. Разумець кантэкст яе жыцця. Сама яна не размаўляе па-беларуску. Але, можа, калі я вывучу вашую мову, змагу матываваць і яе загаварыць на ёй.

Якое любімае слова Элізеў па-беларуску і ці можа ён праз шэсць тыдняў вывучэння вымавіць “Шчучыншчыну”? Чытайце размову з беларускамоўным бразільцам.

“Беларусы фаловяць мяне ў інстаграме, а сябра адвёў на дранікі”

Калі Элізеў толькі прыехаў у Польшчу, ён нічога не ведаў пра Беларусь. Нават не ўяўляў дакладна, дзе яна знаходзіцца. А пасля ў яго з’явілася сяброўка з Беларусі. Тады ён шмат даведаўся пра нашу краіну — але вучыць пачаў не беларускую, а рускую мову. Пасля да рускай дадалася ўкраінская.

І толькі гэтай вясной Элізеў вырашыў кінуць сабе выклік: паглядзець, як хораша ён зможа авалодаць беларускай мовай. І даў сабе на гэта ўсяго толькі тры месяцы.

— Тое, што пачало адбывацца далей — фантастычна! Цяпер беларусы фаловяць меня ў інстаграме, яны пытаюцца, ці патрэбная мне дапамога ў вывучэнні мовы, прапаноўвалі пагаварыць са мной па-беларуску. Гэта вельмі міла.

А ўчора мой сябра спытаў: ты ўжо еў дранікі? Я кажу: не. Ён: добра, адвяду цябе ў Beer Station [беларускі бар у Варшаве — Еўрарадыё]. Маўляў, там лепшыя дранікі ў горадзе. І гэта было — ваў. Вельмі смачна. Мне спадабалася.

Гэта фантастычны вопыт. Спачатку я вывучаў вашую мову як выклік, як challange. Але цяпер усё інакш: гэта вопыт. Вопыт стасункаў з людзьмі, вопыт з новай кухняй.

— Аднойчы я пачну чытаць кнігі па-беларуску, але пакуль чытаю навіны — напрыклад, Еўрарадыё. І з навінаў я даведваюся пра кантэкст жыцця ў Беларусі.

Я гляджу вашыя відэа на ютубе, гляджу і іншыя беларускія медыя. Але таксама мне падабаецца беларускі стэндап: напрыклад, Слава Камісаранка.

З музыкаў мне падабаюцца Iva Sativa і Palina. Наўпрост цяпер у мяне дзве любімыя песні: “Дадому” ад Iva Sativa і “Як ты” ад Паліны. Памятаю, калі я першы раз паслухаў “Як ты”. Гэта быў важны момант для мяне. Да яго я не ведаў, што магу разумець беларускую мову.

“Беларусь — гэта не толькі “бульба” і “Лукашэнка”

Калі Элізеў гаворыць па-беларуску, людзі думаюць, што ён беларус. Калі ён гаворыць па-ўкраінску, прымаюць за ўкраінца.

— І толькі калі я гавару па-руску, людзі чамусьці пытаюцца: “Ты з Узбекістана?” Цікава, — дзеліцца з намі назіраннямі Элізеў.

Часам беларусы пішуць яму ў інстаграме і прызнаюцца, што бразілец матывуе іх саміх размаўляць на роднай мове. Гэта асаблівая радасць для яго.

— Я нарадзіўся ў Бразіліі і размаўляю па-партугальску. Але партугальская — гэта не мова Бразіліі. Гэта мова каланістаў. У Бразіліі амаль не гавораць на мове карэннага насельніцтва. Але ж вельмі важна пачаць гаварыць на сваёй мове.

Ведаеце, я люблю мовы. І лічу, што нельга распавесці гісторыю краіны на замежнай мове. Так, добра, калі людзі ведаюць ангельскую, ведаюць рускую, але нашая родная мова заўсёды найважнейшая.

Я ўпэўнены, што ўсе беларусы ведаюць сваю мову, могуць пачаць размаўляць на ёй, хоць і крыху павольна. Я рэкамендую, каб пачаць свабодней гаварыць па-беларуску, пачаць для пачатку чытаць услых.

Да таго ж, упэўнены, у кожнага беларуса ёсць сябар, які можа свабодна гаварыць па-беларуску. Скажыце яму, што хочаце больш практыкі — і пачынайце гаварыць.

Сам Элізеў не проста размаўляе па-беларуску. Ён размаўляе па-беларуску пра Беларусь.

— Я намагаюся расказваць сваім сябрам-замежнікам не толькі пра палітыку. Людзі амаль нічога не ведаюць пра Беларусь, а Беларусь — гэта не толькі “Лукашэнка” і “бульба”. Гэта вельмі прыгожая краіна, з прыгожай культурай, з прыгожай мовай. Беларусы, якіх я сустрэў — фантастычныя людзі, артыстычныя людзі.

— Дарэчы, а вашыя сябры цікавяцца ў адказ Бразіліяй? Ці прасілі яны навучыць іх прынамсі партугальскай мове?

— Хм. Не памятаю такога. Але калі нехта з беларусаў захоча вывучыць партугальскую — я магу дапамагчы, як цяпер усе беларусы дапамагаюць мне з беларускай.

Я люблю дапамагаць людзям вучыць мовы, бо гэта не так цяжка, як яны думаюць.
 

Выклік для паліглота на дзень народзінаў

Элізеў гаворыць па-партугальску, па-іспанску, па-каталанску, па-італьянску, па-нямецку, па-французску, па-руску, па-польску, па-венгерску і па-ўкраінску. І абяцае, што хутка і па-беларуску загаворыць свабодна. І тады прысвеціць ёй асобны выпуск свайго лінгвістычнага падкаста.

А пакуль можаце паслухаць пра яго вопыт вывучэння моваў тут. Раптам і вы адчуеце, што загаварыць на замежных мовах не так і цяжка. Ці, можа, вам захочацца следам за Элізеў загаварыць па-беларуску?

Сам жа паліглот ужо плануе кінуць сабе новы выклік. На свой дзень народзінаў ён плануе пачаць вывучаць кітайскую мову.