Лукашэнка: паўсюль па Беларусі заробак годным не зробіш

29 ліпеня падчас кадравых прызначэнняў Аляксандр Лукашэнка выказаўся на тэму заробкаў беларусаў. Ён запатрабаваў ад мясцовых кіраўнікоў, каб зарплаты выплачваліся своечасова. Кіраўнік дзяржавы патрабуе, каб яны раслі, хаця і разумее, што зрабіць гэта не так лёгка. "Пастарайцеся зрабіць усё, каб гэты заробак быў калі не годным (паўсюль гэта не зробіш), то цярпімым, каб людзі разумелі, што сёння ў іх такі заробак, заўтра пры пэўных умовах ён павінен быць вышэйшы", — цытуе словы Лукашэнкі яго прэс-служба.

Кіраўнік дзяржавы падкрэсліў, што зарплата для беларусаў — "гэта святое". Яна абавязкова павінна расці, але не праз тое, што хутка выбары (парламенцкія і прэзідэнцкія). Бо людзі "вельмі кепска ўспрымаюць", калі павышэнне заробкаў адбываецца з нейкай палітычнай нагоды, адзначыў ён.