“Шарлі” — вось чаго можаце дачакацца”. Ціханоўскі намякае незалежным СМІ на расправу

Блогер Сяргей Ціханоўскі падчас стрыму на YouTube некалькі разоў паўтарыў, што рэдакцыі беларускіх незалежных медыя можа чакаць лёс французскага сатырычнага часопіса Charlie Hebdo. Нагадаем, што падчас нападу на рэдакцыю ў 2015 годзе загінулі 12 чалавек, а 11 былі параненыя.

"Сябры, „Шарлі“ — вось чаго можаце дачакацца. Донары — гэта не самае страшнае. Вы такую нянавісць распальваеце ў людзей, такую злосць, што вы калі-небудзь пажняце, пажняце плады... плады гэтай нянавісці, якую вы распалілі", — вось адно з выказванняў Ціханоўскага.

Блогер сцвярджае, што ён нават ведае такіх людзей, гатовых учыніць разню. І дадаў, што незалежныя СМІ змагаюцца за лайкі ў сацсетках і прагляды:

"І можа, вось гэтыя людзі, якія сядзяць (а я не аднаго такога чалавека ведаю) — можа быць, яны “Шарлі”  потым і ўчыняць там у гэтай рэдакцыі?

Вось яны пра гэта не думаюць зусім, таму што вось гэтая злосць, нянавісць, вось гэты градус, які будзе нарастаць — ён ужо і так вось тут ужо ў нас, ва ўсіх, у эміграцыі, але ён яшчэ нарастае дзякуючы ім. Таму што яны з рэжымам не змагаюцца. Яны змагаюцца за лайкі, за прагляды. Вось за што яны змагаюцца.

Вось і “Шарлі” — гэта цалкам рэальна яны могуць атрымаць. Цалкам. То-бок знойдзецца нейкі вар'ят, які, начытаўшыся гэтых “Жоўтых Ніваў”, рэальна паверыць, што ён вар'ят і губляць яму няма чаго, адчаіцца, увойдзе ў рэдакцыю туды і ўчыніць ім там “Шарлі”, разумееце? Гэта цалкам магчыма, сябры".

Ці можа хто-небудзь з гледачоў стрыму ўспрыняць як заклік да агрэсіі, уласна, словы Ціханоўскага? Падобна да таго, што яго гэта ўвогуле не хвалюе.

Сяргей Ціханоўскі незадаволены працай незалежных беларускіх СМІ. Пасля таго, як у "Нашай Ніве" выйшаў артыкул пра святкаванне яго дня нараджэння ў ЗША, ён заклікаў дасылаць яму спасылкі на артыкулы, дзе журналісты парушаюць этычныя нормы. Пры гэтым сам Ціханоўскі неаднаразова пакідаў супрацоўнікам медыяў абразлівыя каментары ў сацсетках.