Бойка з манашкамі, паўмільярда кэша ў аэрапорце і вайна — #ІхНоравы

У Ізраілі працягваецца вайна, і канца ёй пакуль не відаць. Але жыццё ідзе сваім парадкам ва ўсім свеце, у чым можна пераканацца, чытаючы традыцыйную рубрыку Еўрарадыё "Іх норавы". Такім чынам, прэмія міру ў Германіі дасталася пісьменніку індыйскага паходжання Салману Рушдзі. У аргкамітэце яго назвалі адным з галоўных абаронцаў свабоды думкі і мовы. На поўдні Францыі манашкі пабіліся з экаактывістамі, якія выступілі супраць будаўніцтва новай царквы. Ну а ў аэрапорце Буэнас-Айрэса на суткі захраслі $500 мільёнаў.

Вайна з ХАМАС будзе працягвацца

Ізраіль мае намер узмацніць паветраныя ўдары па сектары Газа. Мінулай ноччу абстрэлы анклава працягваліся.

Як кажа прэм'ер-міністр Біньямін Нетаньяху: гэты канфлікт для Ізраіля — справа жыцця і смерці. Міністр абароны Ізраіля Ёаў Галант заяўляе, што ваенная кампанія ў Газе можа зацягнуцца яшчэ на некалькі месяцаў, але ўрэшце ХАМАС знікне.

"Пройдзе месяц, два месяцы, тры месяцы, і ўрэшце ХАМАСа больш не будзе. Раней чым ХАМАС сутыкнецца з нашымі танкамі і нашай пяхотай, баевікі даведаюцца пра снарады нашай авіяцыі".

У Францыі манашкі пабіліся з экаактывістамі

На поўдні Францыі манашкі пабіліся з экалагічнымі актывістамі. Пратэстоўцы выступілі супраць будаўніцтва новай царквы на 3500 чалавек.

У панядзелак і аўторак група актывістаў прыйшла на будаўнічую пляцоўку ў Сен-П'ер-дэ-Каламб'е. Кампанія хацела прыкаваць сябе ланцугамі да экскаватара і спыніць будаўніцтва.

Чальцы місіянерскай сям'і Нотр-Дам спрабавалі іх спыніць, але сітуацыя абвастрылася. На кадрах, якія распаўсюджваюцца ў сацыяльных сетках, відаць, як адна з манашак валіць пратэстоўца на зямлю.

Падчас пратэстаў сёстры ўтварылі жывы ланцуг вакол будаўнічай тэхнікі і маліліся, спрабуючы спыніць пратэстоўцаў.

Паводле звестак мясцовай паліцыі, трое чалавек атрымалі нязначныя траўмы.