Беларускі пранкер назваў сябе "героем РФ" і заклікаў школы арганізаваць акцыю
Расіяне з партрэтам беларускага пранкера / t.me/ula_bo/
Беларускі пранкер і мастак Уладзіслаў Бохан арганізаваў чарговую акцыю ў Расіі. Ён даслаў лісты ў некалькі расійскіх школ ад імя Смаленскага рэгіянальнага аддзялення партыі "Адзіная Расія" і заклікаў правесці акцыю з нагоды прысваення "земляку звання Героя Расіі". А менавіта — выйсці з яго партрэтамі. На партрэце было фота Бохана. Некалькі школ просьбу выканалі — расіяне з партрэтам беларуса ў руках рабілі здымкі для "справаздачы". Настаўнікі і школьнікі трымалі самаробныя плакаты: "Уладзіслаў — наш герой", "У вас верыць уся Расія".
Раней Бохан арганізоўваў падобныя акцыі і ў Беларусі, і ў Расіі. Нядаўна настаўнікі школ Курскай вобласці РФ з яго падачы прынялі ўдзел ва "Усерасійскім малебне аб перамозе".
