За “нецэнзурную лаянку” больш не будуць штрафаваць?
![За “нецэнзурную лаянку” больш не будуць штрафаваць?](/sites/default/files/styles/gallery_main/public/2023-08/img_3894.jpg.webp?itok=9YEYsEHv)
Артыкул 17.1 Кодэкса Аб адміністрацыйных правапарушэннях “хуліганства” прапануюць змяніць. Гэта вынікае з законапраекта па зменах у кодэкс, які паступіў у Палату прадстаўнікоў на абмеркаванне. Самую распаўсюджаную ў судах пасля палітычных акцый фармулёўку “нецэнзурная лаянка” плануюць выключыць. Пакінуць толькі “зневажальнае прыставанне да грамадзян і іншыя дзеянні, якія парушаюць грамадскі парадак”.
На думку праваабаронцы Валянціна Стэфановіча, цяпер нецэнзурную лаянку проста будуць замяняць на “іншыя дзеянні, якія парушаюць грамадскі парадак”. Пра гэта праваабаронца распавёў у размове з Еўрарадыё.
Валянцін Стэфановіч: “Справа не ў артыкуле, а ў палітычным матыве ўжывання артыкула. У прынцыпе, у другую частку артыкула можа ўпісвацца нецэнзурная лаянка. У нас жа адміністрацыйная адказнасць была не за саму лаянку, а за тое, што гэтая лаянка выражала непавагу да грамадства. Так што, радыкальна гэта нічога не зменіць. Навошта гэта? Падкрэслілі, што судзяць не за лаянку, а за непавагу да грамадства”.
Актывіста і чэмпіёна па “сутках” Паўла Вінаградава 12 разоў судзілі за “нецэнзурную лаянку”. Агулам гэта больш за 120 сутак на Акрэсціна.
![За “нецэнзурную лаянку” больш не будуць штрафаваць?](/sites/default/files/paragraphs/image/vonogradov.jpg)
“Як аматар абсцэннай лексікі, не лічу, што за гэта варта саджаць за краты. Нягледзячы на гэта, я ні разу не выражаўся нецэнзурна ў прысутнасці, як мінімум, міліцыі”.
У кодэкс аб адміністрацыйных правапарушэннях прапануюць унесці і іншыя змены. У асноўным, яны закранаюць кіроўцаў, якіх цяпер прапануюць не пазбаўляць правоў за перавышэнне хуткасці і не штрафаваць за забытае дома пасведчанне.