У Брэсцкай абласной бальніцы арыштавалі кіраўніцтва — "Наша Ніва"

У Брэсцкай абласной клінічнай бальніцы сілавікі правялі арышты сярод кіраўніцтва, піша "Наша Ніва".

На мінулым тыдні прапаў 66‑гадовы галоўны лекар Аляксандр Карпіцкі. У прыёмнай кажуць: "Бліжэйшым часам можаце яго нават не набіраць". Прычыну яго адсутнасці назваць не могуць.

Няма на працоўным месцы і яго намесніка Андрэя Шасцюка. Паводле афіцыйнай версіі, "Андрэй Міхайлавіч на бальнічным". Але "Наша Ніва" мяркуе, што яго таксама затрымалі.

Аляксандр Карпіцкі — заслужаны лекар Беларусі, аўтар 15 вынаходніцтваў, ганаровы грамадзянін Брэсцкай вобласці. Галоўным лекарам абласной клінікі ён з'яўляецца з 2000 года. Упершыню ў вобласці Карпіцкі сам правёў пластычныя аперацыі на страваводзе з замяшчэннем яго страўнікам, страўнікавай трубой, тоўстай і тонкай кішкай. А ў 2014‑м зрабіў першую ў Беларусі алатрансплантацыю лёгачнай артэрыі. Таксама ён з’яўляецца чальцом Савета Рэспублікі ад Брэсцкай вобласці. Пасля выбараў 2020 года яго імя было ўнесенае ў Чорную кнігу Беларусі: Карпіцкі па палітычных матывах не працягваў кантракты маладым спецыялістам.

Андрэй Шасцюк — хірург, кандыдат медыцынскіх навук. На яго рахунку — каля 200 аперацый на год і шэсць патэнтаў.

Афіцыйна арышт медыкаў пакуль не пацверджаны.