"Ёсць і добрыя супрацоўнікі". Хто і навошта ідзе ў Акадэмію МУС?
Хтосьці чытаў Агату Крысці, хтосьці хоча рабіць свет лепшым / калаж Еўрарадыё
Прыёмная кампанія на бюджэт ужо скончылася, і мы працягваем падводзіць яе вынікі. Еўрарадыё расказвала пра будучых юрыстаў і журналістаў. Цяпер мы паспрабавалі пагутарыць і з тымі, хто надумаў вучыцца ў Акадэміі МУС. Герояў мы шукалі ў абмеркаванні абітурыентаў у суполцы "УКантакце".
"Па ўсіх пытаннях звяртайцеся ў прэс-службу МУС альбо ў групу інфармацыі і грамадскіх сувязяў Акадэміі МУС Рэспублікі Беларусь", — адказаў адзін з суразмоўцаў.
"Метады працы ўсюды розныя"
Ганна (імя зменена) кажа, што пайшла ў Акадэмію, таму што "хоча звязаць жыццё з сістэмай МУС". Яна на завочцы, вывучае судова-пракурорска-следчую дзейнасць, цяпер праходзіць першапачатковую падрыхтоўку супрацоўнікаў органаў унутраных спраў.
— У хуткім часе ўжо буду супрацоўнікам, і пасля заканчэння Акадэміі будзе больш магчымасцяў прасунуцца ў кар'еры, — кажа дзяўчына.
