Кіраўнік МУС хоча, каб міліцыі дазволілі дзейнічаць без санкцыі пракурора
Міліцэйскія вучэнні на Гомельшчыне / МУС
Паўнамоцтвы аператыўна-сітуацыйных штабоў (АСШ) міліцыі трэба пашырыць, каб яны маглі прымаць рашэнні ў асаблівых умовах без санкцыі пракурора. Такую прапанову агучыў міністр унутраных спраў Іван Кубракоў падчас комплексных камандна-штабных вучэнняў УУС Гомельскай вобласці.
"Варта прапрацаваць пытанне, каб пры дзеяннях у асаблівых умовах мы маглі прымаць пэўныя рашэнні без санкцыі пракурора. Для гэтага паўнамоцтвы кіраўнікоў АСШ павінны быць пашыраныя. Важна ўлічыць усе юрыдычныя аспекты", — перадае ягоныя словы прэс-служба МУС.
Таксама ён заявіў, што ўсе ўводныя ўмовы на цяперашніх вучэннях накіраваныя на праверку фізічнай трываласці і гатоўнасці ўжываць зброю.
"Пры спыненні масавых беспарадкаў працуем выразна і зладжана. Рашэнні прымаеце вы, дзейнічаеце строга ў адпаведнасці з заканадаўствам. Галоўнае — не дапускаць правакацый, спыняючы іх у самым пачатку", — падкрэсліў міністр.
