У МЗС Беларусі выказаліся наконт каментара пасольства Расіі пра Касцюшку

У МЗС Беларусі выказаліся наконт каментара пасольства Расіі пра Касцюшку

У МЗС Беларусі выказаліся пра каментар пасольства Расіі пра Тадэвуша Касцюшку. Нацыянальны гістарычны музей 4 лютага ў сацсетках нагадаў пра 275-я ўгодкі з дня нараджэння нашага знакамітага земляка і назваў яго "нацыянальным героем чатырох краін". На гэта адрэагаваў работнік пасольства Расіі ў Беларусі, які напісаў пра "гістарычнае невуцтва".

Прэс-сакратар МЗС Беларусі Анатоль Глаз пракаментаваў гэтую спрэчку. "Беларусь, беларускі народ для сябе сваіх герояў, у тым ліку гістарычных, вызначыў, — кажа ён. — І зрабіў гэта карэктна, не ўмешваючыся ў справы іншых і не залазячы на чужую тэрыторыю".

Па словах Глаза, у беларусаў "няма комплексаў з гэтай нагоды, і нашай краіне не патрэбнае прызнанне або адабрэнне ад каго б там ні было гэтага факту, акрамя саміх беларусаў".

Прадстаўнік МЗС нагадаў, што Беларусь — суверэнная краіна. "Мы не збіраемся перапісваць гісторыю, — працягвае Глаз. — Больш за тое, мы сумесна з Расійскай Федэрацыяй гэтаму супрацьстаім".

Анатоль Глаз адзначыў, што "Нацыянальны гістарычны музей выказаў нармальную і адназначную пазіцыю".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.

Апошнія навіны

Галоўнае

Выбар рэдакцыі