У Беларусі пасля адмены віз чакаюць сустрэчных крокаў ЕС

У Беларусі пасля адмены віз чакаюць сустрэчных крокаў Еўрасаюза. Указам Аляксандра Лукашэнкі ўведзены пяцідзённы бязвізавы рэжым для грамадзян 80 краін (новаўвядзенне распаўсюджваецца на ўсе краіны ЕС). Умова адна — у нашу краіну трэба ўехаць праз Нацыянальны аэрапорт Мінск (пад дзеянне ўказу не трапляюць тыя асобы, якія прылятаюць у Беларусь авіярэйсамі з Расіі).

Начальнік галоўнага консульскага ўпраўлення МЗС Беларусі Ігар Фісенка адзначыў, што візавыя правілы Еўрасаюза ўстаноўленыя рашэннем 28 краін і "даволі складана разлічваць на тое, што яны будуць змененыя ў залежнасці ад рашэння Беларусі". У той жа час у Мінску спадзяюцца, што "Еўрапейскім саюзам гэтае рашэнне будзе прынятае да ведама і будуць прынятыя нейкія сустрэчныя крокі ў накірунку развіцця кантактаў паміж Беларуссю і ЕС", інфармуе БЕЛТА.