Сікорскі раіць апазіцыі не чапаць Януковіча, пакуль той не звольніць урад
Але калі апазіцыя паслухаецца парады Радаслава Сікорскага, то пойдзе ў адстаўку разам з Януковічам.
Украінскую апазіцыю польскі міністр замежных спраў Радаслаў Сікорскі злавіў на тактычнай памылцы. Яны дарэмна патрабуюць адстаўкі прэзідэнта краіны Віктара Януковіча, упэўнены міністр.
“Патрабаванне адстаўкі прэзідэнта Украіны — гэта палітычная памылка, бо прэзідэнт з’яўляецца тым чалавекам, які прымае рашэнне аб стварэнні кааліцыйнага ўраду альбо аб падпісанні пагаднення аб асацыяцыі”, — упэўнівае польскі міністр у эфіры тэлеканала TVN24.
Радаслаў Сікорскі
Але сітуацыя на Майдане сёння выглядае так, што калі апазіцыя пагодзіцца з Сікорскім, то пойдзе ў адстаўку следам за Януковічам, тлумачыць Еўрарадыё намеснік лідара партыі “Свабода”, сябра камітэта па пытаннях нацыянальнай бяспекі і абароны Вярхоўнай Рады Украіны Юрый Сірацюк.
Юрый Сірацюк: “Патрабаванне адстаўкі Януковіча — гэта не патрабаванне “Свабоды”, “Бацькаўшчыны” ці “Удару”. Гэта — патрабаванне Майдана. Майдан патрабуе поўнага дэмантажу ўлады: адстаўкі прэзідэнта, ураду, роспуску Вярхоўнай Рады і адначасовых адміністрацыйных і парламенцкіх выбараў. Калі сёння лідары апазіцыі скажуць, што яны адмаўляюцца ад гэтых патрабаванняў, то народ на Майдане адмовіцца ад такіх лідараў!”
Юрый Сірацюк
“Мы і так амаль стрымліваем людзей ад прымусовай “адстаўкі” Януковіча”, — падтрымлівае калегу дэпутат ад партыі “Бацькаўшчына” Андрэй Паўлоўскі.
Андрэй Паўлоўскі: “Мы ўчора ледзь стрымлівалі людзей — яны хацелі 100-тысячным натоўпам ісці да Януковіча ў госці. Каб ён убачыў і пачуў, чаго хочуць людзі і чаго яны патрабуюць. І думаю, што калі ён на гэтым тыдні нічога не зразумее, то людзі ўсё ж пойдуць да яго ў госці”.
Андрэй Паўлоўскі
“І што ў такім выпадку застанецца рабіць лідарам апазіцыі?” — задаюць рытарычнае пытанне суразмоўцы Еўрарадыё.
Былы намеснік міністра замежных спраў Украіны, палітолаг Валерый Чалы прызнае: часткова выказванні Радаслава Сікорскага супадаюць з яго бачаннем сітуацыі. Справа ў тым, што ёсць такія патрабаванні, якія мусіць выконваць менавіта прэзідэнт Украіны.
Валерый Чалы: “Гэта тычыцца і ўжывання санкцыяў у дачыненні да тых, хто прымяніў сілу супраць мірных дэманстрантаў, гэта тычыцца пытання адстаўкі ўраду. Гэтыя пытанні ў кампетэнцыі прэзідэнта Украіны, і відавочна, што шмат пытанняў трэба вырашаць разам з ім”.
Складана сказаць, як бы паводзілі сябе лідары апазіцыі, калі б іх запрасілі за круглы стол перамоў з уладамі, але…
Валерый Чалы: “Можа быць знойдзена паразуменне за круглым сталом з удзелам Віктара Януковіча. Але сёння сітуацыя, на жаль, такая, што дзеючая ўлада пакуль што не ідзе ні на якія кампрамісы, і таму сітуацыя не паляпшаецца, а з кожным днём абвастраецца”.
Валерый Чалы
А вось калі Януковіч рашыцца на сілавы разгон Майдана, то людзі будуць мець гарантаванае самой Канстытуцыяй права патрабаваць адстаўкі прэзідэнта — ён стане ў такім выпадку нелегітымным кіраўніком краіны.
Валерый Чалы: “Найбольшая праблема — ужыванне сілавога сцэнару. Тады ўжо не будзе лозунгаў апазіцыі, круглых сталоў — будуць мала кантраляваныя дзеянні вялікіх мас людзей. Якія ператвараюцца ў такіх умовах у грамадзянскую супольнасць, у народ Украіны”.
Сёння, пагаджаецца Валерый Чалы з Радаславам Сікорскім, нерэальна гаварыць пра адстаўку прэзідэнта Януковіча, але “сітуацыя можа змяніцца ў лічаныя дні”. А ў які бок яна зменіцца, найперш залежыць ад “гаранта Канстытуцыі”, сцвярджаюць суразмоўцы Еўрарадыё.
