Рада БНР узнагародзіла 14 беларускіх добраахвотнікаў, якія ваююць ва Украіне
Беларускія добраахвотнікі / t.me/belwarriors/
На Дзень беларускай вайсковай славы Рада БНР узнагародзіла 14 беларускіх добраахвотнікаў, якія ваююць ва Украіне. Яны атрымалі медаль "За баявыя заслугі" "за асабістую адвагу ў баях супраць расійскіх захопнікаў ва Украіне". Былі адзначаныя сем байцоў палка Каліноўскага, шэсць чалавек з 1-й Асобнай дэсантна-штурмавой роты (у складзе дэсантна-штурмавых войскаў Украіны), адзін баец вайсковаей часткі А2167 УСУ (праўдападобна, 72-й асобнай механізаванай брыгады).
Упершыню Рада БНР узнагародзіла медалём "За баявыя заслугі" 22 байцоў-каліноўцаў у сакавіку 2023-га. Агулам на дадзены момант медалём адзначаныя 36 байцоў.
"Гэтыя адважныя сыны і дачкі Беларусі бароняць беларускі нацыянальны гонар, — піша прэс-служба Рады БНР. — ...Узнагароджаныя беларускія байцы — гэта героі, чые імёны яшчэ прыйдзе час апублікаваць. Яны куюць нашую агульную перамогу і закладаюць падмурак для будучай арміі свабоднай Беларусі".
